قه‌ته‌ر داوا ده‌كات لایه‌نه‌كان به‌ ئاگربه‌سته‌وه‌ پابه‌ند بن و گرژییه‌كان ڕابگرن

په‌یام

وەزارەتی دەرەوەی قەتەر پێشوازی لە ڕاگەیاندنی ئاگربەستی نێوان ئەمریکا و ئێران دەکات و داوای پابەندیی تەواو و ڕاگرتنی دەستبەجێی گرژییەکان دەکات، بە ئامانجی پاراستنی سەقامگیریی ناوچەکە و ئاسایشی دەریاوانی و ڕێڕەوە نێودەوڵەتییەکان. 

دەوحە بە فەرمی خۆشحاڵی خۆی بۆ ڕێککەوتنی ئاگربەستی نێوان واشنتۆن و تاران نیشان دا و جەختی لەسەر پێویستیی قۆستنەوەی ئەم هەنگاوە کردەوە بۆ ڕێگریکردن لە تەشەنەسەندنی ئاڵۆزییەکان لە ڕۆژهەڵاتی ناوەڕاست. لەم چوارچێوەیەشدا، سوپاس و پێزانینی خۆی ئاڕاستەی پاکستان و هەموو ئەو لایەنانە کرد کە وەک نێوەندگیر ڕۆڵیان هەبووە لە نزیککردنەوەی دیدگای هەردوولا و گەیشتن بەم قۆناغە. 

وەزارەتی دەرەوەی قەتەر دووپاتی دەکاتەوە کە پابەندبوونی هەمەلایەنە بە ئاگربەستەکە، تەنها ڕێگەیە بۆ جێگیرکردنی هێمنی و ڕەخساندنی زەمینەیەکی گونجاو بۆ دەستپێکردنی دیالۆگێکی بنیاتنەر. هەروەها داوا دەکات هەنگاوی خێرا بنرێت بۆ کۆتاییهێنان بەو کردار و ڕەفتارانەی کە دەبنە هۆی تێکدانی سەقامگیری، بە تایبەتی لەلایەن ئێرانەوە کە پێویستە دەستبەجێ کۆتایی به ‌هەموو جۆرە هەژموونێکی سەربازی و گرژییەکان بهێنێت. 

لە لایەکی دیکەوە، دەوحە جەختی لەسەر گرنگیی پاراستنی ئاسایشی ڕێڕەوە ئاوییەکان و دەستەبەرکردنی ئازادیی کەشتیوانی و بازرگانیی نێودەوڵەتی کردووەتەوە.