ئیسرائیل: سکرتێرى تایبەتی ئەمیندارمان لە بەیرووت کوشت

پەیام
بنیامین نەتانیاھۆ، سەرۆک وەزیرانی ئیسرائیل، کوژرانی عەلی یوسف حەرشی، سکرتێری تایبەتی ئەمینداری گشتیی حزبوڵای لوبنانی ڕاگەیاند و جەختی لە بەردەوامیی هێرشە ورد و کوشندەکانی سوپاکەی بۆ سەر پێگەکانی ئەو حزبە لە تەواوی ناوچەکە کردەوە. 
لە چوارچێوەی پەرەسەندنی گرژییە سەربازییەکاندا، سەرۆک وەزیرانی ئیسرائیل ئاشکرای کرد کە هێزەکانیان توانیویانە یەکێک لە کەسایەتییە نزیک و کاریگەرەکانی ناو بازنەی بڕیار لە حزبوڵڵا بکەنە ئامانج. نەتانیاھۆ ئاماژەی بەوە کرد کوژرانی سکرتێری تایبەتی ئەمینداری گشتیی حزبەکە، بەشێکە لە ستراتیژیی نوێی وڵاتەکەی بۆ لاوازکردنی تواناکانی ئەو ڕێکخراوە و پچڕاندنی پەیوەندییە هەستیارەکانی ناو سەرکردایەتییەکەیان. 
نەتانیاھۆ دووپاتی کردەوە ئۆپراسیۆنە سەربازییەکانیان بە هەمان هێز و بە وردییەکی زۆرەوە بەردەوام دەبن. ڕاشیگەیاند کە ئیسرائیل لە لێدانەکانی بۆ سەر حزبوڵڵا ناوەستێت و لە هەر شوێنێک پێویست بێت هێرش دەکەنە سەریان، تا ئەو کاتەی ئارامی و ئاسایشی تەواو بۆ ناوچەکانی باکووری ئیسرائیل دەگەڕێتەوە و مەترسییەکانی سەر دانیشتوانی ئەو سنوورانە بە یەکجاری کۆتاییان دێت.