بەرپرسێکی ئیسرائیلی: نەتوانراوە مەترسی ئەتۆمی لەناو ببرێت کە جەنگمان لەو پێناوەدا بەرپاکرد

پەیام
سەرچاوەیەکی ئەمنیی باڵای ئیسرائیل دان بەوەدا دەنێت کە وڵاتەکەی نەیتوانیوە ئامانجە سەرەکییەکانی لە جەنگی دژ بە ئێران بەدەستبهێنێت و هێشتا مەترسیی پڕۆژە ئەتۆمییەکەی تاران وەک هەڕەشەیەکی جیددی لەسەر ئیسرائیل ماوەتەوە. 

کەناڵی ١٢ی ئیسرائیلی لە زاری سەرچاوەیەکی ئەمنییەوە بڵاویکردەوە، سەرجەم ئەو ئامانجە ستراتیژییانەی کە ئیسرائیل بەهۆیەوە چۆتە نێو جەنگ لەگەڵ ئێران، تاوەکو ئێستا وەک خۆیان ماونەتەوە و جێبەجێ نەکراون. سەرچاوەکە ئاماژەی بەوە کردووە کە سوپا و دامەزراوە ئەمنییەکان لە پێکانی ئامانجە ناوەندییەکانی ئەم ڕووبەڕووبوونەوەیەدا سەرکەوتوو نەبوون. 

لە بەشێکی دیکەی زانیارییەکاندا هاتووە، ئەو هۆکارە سەرەکییەی کە ئیسرائیل جەنگی لەپێناودا دەستپێکرد، کە بریتی بوو لە نەهێشتنی هەڕەشەی چەکی ئەتۆمیی ئێران، هێشتا وەک مەترسییەکی گەورە لەسەر مێزی گفتوگۆکان ماوەتەوە. ئەم دانپێدانانە نیشانەی جۆرێک لە شکستی سەربازی و هەواڵگرییە لە کۆنترۆڵکردنی توانا ناوەکییەکانی کۆماری ئیسلامی ئێراندا. 

ئەم لێدوانە فەرمییە لە کاتێکدایە کە گرژییەکانی ناوچەکە لە ئاستێکی بەرزدان، بەڵام بەرپرسە ئەمنییەکان پێیان وایە ئەو ئەنجامە خوازراوەی کە بڕیار بوو لە ڕێگەی بژاردەی سەربازییەوە بەدیبهێنرێت، نەهاتۆتە دی و بەرنامە ئەتۆمییەکەی ئێران هێشتا لە پەرەسەندندایە.