سبەی پەرلەمانی عێراق بۆ دەنگدان بە پۆستی سەرۆككۆمار كۆدەبێتەوە

پەیام

ڕۆژی شەممە پەرلەمانی عێراق كۆ دەبێتەوە و سەرۆككۆماری عێراق هەڵدەبژێرێت. جێگری دووەمی سەرۆكی پەرلەمانیش دەڵێت لە خشتەی كۆبوونەوەكە ڕازی نییە.

فەرمانگەی ڕاگەیاندنی ئەنجوومەنی نوێنەرانی عێراق بڵاوی كردەوە، ڕۆژی شەممە 11ى 4ى 2026 كاتژمێر 11 ی پێشنوەڕۆ كۆبوونووەی ژمارە 17 ی  پەرلەمان دەست پێ دەكات. 

ڕاشیگەیاندووە: تەوەری سەرەكیی كۆبوونەوەی پەرلەمان، دەنگدان و هەڵبژاردنی سەرۆككۆماری عێراقە.

دیاریكردنی وادەی هەڵبژاردنی سەرۆككۆمار لە كاتێكدایە، تا ئێستا كۆدەنگی و ڕێككەوتن لەسەر پۆستەكە نەكراوە و، هەریەك لە پارتی و یەكێتی و لایەنە ئۆپۆزسیۆنەكان بە كاندیدی جیاوازەوە دەچنە ململانێوە، هاوكات ژمارەیەك كاندیدی سەربەخۆ لە پێكهاتە جیاوازەكانی كورد، سوننە و شیعە خۆیان بۆ پۆستی سەرۆككۆماری عێراق كاندید كردووە.

لای خۆیەوە، فەرهاد ئەترووشی، جێگری دووەمی سەرۆكی ئەنجوومەنی نوێنەران كە سەر بە پارتییە ڕایگەیاندووە، لە سۆنگەی سووربوون لەسەر سەقامگیریی سیاسی و دڵنیاییدان لە ڕێڕەوی دیموكراسی لە عێراقدا، ڕای دەگەیەنین كە ڕازی نین لە خشتەی كارەكانی دانیشتنی ڕۆژی شەممە 11ی نیسان تایبەت بە هەڵبژاردنی سەرۆككۆمار.
لەبارەی هۆكاری ناڕازیبوونەكەیەوە، فەرهاد ئەترووشی ڕاشیگەیاند: تا ئێستا كۆدەنگیی سیاسی و نیشتیمانی لەسەر شایستەكانی هەڵبژاردن نییە بەتایبەت پۆستی سەرۆككۆمار كە وێنای یەكپارچەیی وڵاتە و پارێزگاری لە دەستوور دەكات.