ئێران: گەرووى هورمز لەژێر كۆنترۆڵدایە و قۆناغێكی نوێ دەستی پێ كردووە

پەیام

سوپای پاسدارانی ئێران لە پەیامێكی هۆشداریدا بۆ جیهان و ئەمریكا، ئاشكرای دەكات كە لە كاتی جێبەجێكردنی ئاگربەستی كاتیدا، بەتەواوی دەستیان بەسەر ئیدارەی گەرووی هورمزدا گرتووە و قۆناغێكی نوێیان لە كەنداو دەست پێ كردووە. 

هێزی دەریایی سوپای پاسداران ئەمڕۆ هەینی لە هەژماری فەرمیی خۆی لە پلاتفۆرمی (ئێكس) بڵاوی كردەوە، لە ماوەی ئەم دوو ڕۆژەی بێدەنگیی جەنگدا، دۆست و دوژمن تێگەیشتن كە بەڕێوەبردنی گەرووەكە چووەتە ئاستێكی دیكەوە. 

بەپێی ڕاگەیەنراوەكە، تاران دەیەوێت بە واشنتۆن بسەلمێنێت كە ئاسایشی دەریاوانی تەنیا لەڕێگەی ڕەزامەندیی ئەوانەوە دەكرێت و بەهیچ شێوەیەك دەستبەرداری ئەو مافەی نابێت لە هەر دانوستانێكی ئاشتیدا. 

سوپای پاسداران دوێنێ پێنجشەممەیش چەند ڕێڕەوێكی جێگرەوەی لە نزیك دوورگەی (خارگ) ی ئێرانی دیاری كردبوو بۆ تێپەڕبوونی كەشتییەكان، بەڵام مەرجی ئەوەی دانا كە دەبێت سەرەتا لەگەڵ هێزی دەریاییی ئێراندا هەماهەنگی بكەن.