ترەمپ: پێویستە ئێران واز لە وەرگرتنی باج لە گەرووی هورمز بهێنێت

پەیام

دۆناڵد ترەمپ، سەرۆكی ئەمریكا هۆشداری دەداتە دەسەڵاتدارانی تاران و دەڵێت: پێویستە لە گەرووی هورمز. واز لە سەپاندنی باج و گومرگ بەسەر كەشتییە نەوتهەڵگرەكاندا بهێنن.

ترەمپ ئەمڕۆ هەینی لە پلاتفۆرمی (تروس سۆشیاڵ) بڵاویكردەوە: "ئێران كارێكی زۆر خراپ و نەشیاو دەكات لە وەرگرتنی باج و گومرگ بەسەر ئەو كەشتیانەی بە گەرووی هورمزدا تێدەپەڕن، ئەمە ئەو ڕێككەوتنە نییە كە ئێمە هەمانە!" 

سەرۆكی ئەمریكا ئەو ڕاپۆرتانەی كە باس لە وەرگرتنی پارە لەلایەن سوپای پاسدارانەوە دەكەن، بە كارێكی مەترسیدار ناو برد و ڕاشیگەیاند: "باشترە بۆیان ئەمە ڕاست نەبێت، ئەگەر ڕاستیش بێت دەبێت هەر ئێستا بیوەستێنن". 

ئەم لێدوانانە لە كاتێكدان كە قەیرانی دەریاوانی لە كەنداو گەیشتووەتە لوتكە و بازاڕەكانی وزەی جیهانی بەتەواوی شڵەژاندووە، چونكە تاران پێشتر ڕایگەیاندبوو، بەبێ هەماهەنگی و مۆڵەتی ئەوان هیچ كەشتییەك ناتوانێت تێپەڕ ببێت.