1 کاتژمێر پێش ئێستا
103 جار خوێنراوەتەوە
هەرێم و بەغداد بۆ جێبەجێكردنی سیستمی ئەسیكۆدا لە هەولێر كۆبوونەوە
پەیام
كۆبوونەوەی شاندی باڵای حكومەتی فیدڕاڵ لەگەڵ بەرپرسانی هەرێمی كوردستان لە شاری هەولێر و لەبارەی جێبەجێكردنی سیستمی ئەلیكترۆنیی "ئەسیكۆدا" لە سەرجەم دەروازە سنوورییەكانی هەرێم بەڕێوەدەچێت.
سامر قاسم داود، بەڕێوەبەری گشتیی گومرگی عێراق ئاماژەی بە كۆبوونەوەكە كرد و ڕایگەیاند: كۆبوونەوەكە لەگەڵ دەستەی گومرگەكانی هەرێمی كوردستان لەبارەی جێبەجێكردنی سیستمی ئەسیكۆدا لە خاڵەسنوورییەكانی هەرێمی كوردستان وەك سەرجەم خاڵە سنوورییە فیدڕاڵییەكان بووە.
سامر قاسم داود وتیشی: حكومەتی فیدڕاڵ پاڵپشتیی تەواوی پەرەپێدانی كاروباری گومرگیی لە هەرێمی كوردستان دەكات.
ناوبراو جەختی كردەوە، بەغداد ئامادەیە هەموو شارەزاییە تەكنیكییەكانی پێشكەش بە هەرێم بكات تاوەكو سیستەمی "ئەسیكۆدا" وەك ناوچەكانی دیكەی عێراق لە دەروازەكانی هەرێمیش جێبەجێ بكرێت.
بە پێی زانیارییەكان، بڕیارە لە گفتوگۆكاندا ڕێككەوتنی كۆتایی بكرێت و هەردوو شاندەكە لەگەڵ ڕەشنووسەكەی بچنە سەرۆكایەتی ئەنجومەنی وەزیرانی عێراق بە مەبەستی تاوتوێكردن و واژووكردنی.
پێشتر سام جەلال ڕاوێژكاری وەزارەتی ناوخۆی هەرێمی كوردستان ڕایگەیاندبوو "هەولێر و بەغداد لەسەر جێبەجێكردنی سیستمەكە گەیشتوونەتە ڕێككەوتن و تێیدا یاسا و تایبەتمەندییەكانی هەرێم ڕەچاو كراون".
لە تۆڕە کۆمەڵایەتیەکان شەیری بکە