30/05/2026
593 جار خوێنراوەتەوە
گەشتیاران بۆ بینینی كۆچی پێچەوانەی ماسی دارەخ ڕوو لە پارێزگای وان دەكەن
پەیام
هەزاران گەشتیار بۆ بینینی كۆچی ماسی دارەخ لە دەریاچەكەیدا ڕوو لە پارێزگای وان لە باكووری كوردستان دەكەن.
هەزاران گەشتیار هاوكات لەگەڵ پشووەكانی جەژنی قوربان ڕوو لە پارێزگای وان لە باكووری كوردستان دەكەن بۆ بینینی كۆچی ماسی دارەخ كە ساڵانە لەم وەرزەدا دەبینرێت.
كۆچی ماسی دارەخ كە لە دەریاچەی وان دەژی و لەنێوان 15ی نیسان، مانگی چوار تا 15ی تەممووز، مانگی حەوتدا بە مەبەستی گەرادانان، بەپێچەوانەی ئاڕاستەی ئاو مەلە دەكات و خۆی دەگەیەنێتە ئاوە سازگارەكان، درێژەی هەیە.
هەموو ساڵێك هەزاران كەس دەبنە شایەتحاڵی كۆچی ئەو ماسییانەی لە هەمان ڕێكەوتی هەموو ساڵێكدا، بە مەبەستی دانانی گەراكانیان خۆیان لە ئاوە سوێرەكانی دەریاچەكەوە دەگەیەننە ئاوە سازگارەكان.
لە ڕۆژانی پشووی جەژندا شارۆچكەی ئەرجیش لە وان بووە شوێنی هەزاران گەشتیار و ئارەزوومەندانی فۆتۆگرافی بۆ بینینی كۆچی ماسییەكان و تۆماركردنی بە كامێرا و مۆبایلەكانیان.
هاوكات نەوڕەس و قەلەڕەشەكانی ناوچەكە لە بۆسەدان بۆ ئەوەی ڕاوی ماسییە دارەخەكان بكەن كە بە پێچەوانەی ئاڕاستەی ئاو مەلە دەكەن.
لە تۆڕە کۆمەڵایەتیەکان شەیری بکە