زەنگی ئاگادارکردنەوە لە ٢٠ ناوچەی ئیسرائیل لێدرا

پەیام
سوپای ئیسرائیل ڕایگەیاند لە لوبنانەوە دەستەیەک مووشەک ئاراستەی ناوچەکانی باکوور کراون و بەهۆیەوە زەنگی مەترسی لە جەلیل لێدراوە، ئەمەش هاوکاتە لەگەڵ خۆ حەشاردانی دەیان هەزار جوولەکەی نیشتەجێی ئەو ناوچانە. 
ڕادیۆی سوپای ئیسرائیل ئاشکرای کرد، زنجیرەیەک مووشەک کە ژمارەیان ١٠ دانە بووە، لە خاکی لوبنانەوە بەرەو شارەکانی عەکا، نهاریا و چەند ناوچەیەکی جەلیل هاوێژراون. سوپا توانیویەتی بەشێک لەو مووشەکانە لە ئاسماندا تێکبشکێنێت و ڕێگرییان لێ بکات. 
بەپێی زانیارییەکانی هەمان سەرچاوە، لە بەیانیی ئەمڕۆوە حزبوڵڵای لوبنان نزیکەی ٣٠ مووشەکی ئاراستەی شارۆچکەکانی باکوور کردووە، ئەوەش دۆخێکی نائاسایی دروست کردووە و دەیان هەزار کەس لە نیشتەجێی ئەو ناوچانەی ناچار کردووە ڕوو لە پەناگەکانی ژێرزەوی بکەن. 
لای خۆیەوە کەناڵی ١٢ی ئیسرائیل بڵاوی کردەوە، زەنگی مەترسی لە لانی کەم ٢٠ کۆمەڵگەی نیشتەجێبوون لە جەلیلی ڕۆژئاوا لێدراوە. ئاماژە بەوەش کراوە کە دوای دوو ڕۆژ لە ئارامی، ئەمە یەکەمین جارە دەنگی زەنگی ئاگادارکردنەوە لە شاری عەکا دەبیسترێت. 
لە لایەکی دیکەوە، بەرگریی شارستانیی ئیسرائیل (بەرەی ناوخۆ) دووپاتی کردەوە بەهۆی هێرشە مووشەکییەکانەوە، زەنگی مەترسی لە کۆمەڵگەی "دۆفیڤ" لە کەرتی ناوەندیی جەلیلی سەروو چالاک کراوە. هاوکات سەرچاوە هەواڵییەکان ئاماژە بەوە دەدەن کە سێیەم وەجبەی مووشەکەکان لە باشووری لوبنانەوە بەرەو ئامانجەکانیان لە ناوخۆی ئیسرائیل تەقێنراون.