وەزارەتی دەرەوەی ئێران: لەگەڵ ئەمریکا بەردەوامین لە ئاڵوگۆڕی پەیام

پەیام
وەزارەتی دەرەوەی ئێران ڕایدەگەیەنێت بە ئامانجی کۆتاییهێنان بە جەنگ و دەستەبەرکردنی قەرەبووکردنەوە چوونەتە نێو دانوستانەکانەوە و ئاڵوگۆڕی نامەکانیش لەگەڵ ئەمریکا بەردەوامییان هەیە. 
وتەبێژی وەزارەتی دەرەوەی ئێران ئاشکرای کرد کە ئامانجی سەرەکییان لە بەشداریکردن لە دانوستانەکاندا، ڕاگرتنی شەڕ و زامنکردنی مافەکانی گەلی ئێرانە، لەگەڵ بەدەستهێنانی قەرەبووی زیانەکانی جەنگ. 
سەبارەت بە پەیوەندییەکان لەگەڵ واشنتن، وتەبێژەکە ئاماژەی پێ کرد کە پرۆسەی ئاڵوگۆڕی نامە لەگەڵ ویلایەتە یەکگرتووەکانی ئەمریکا لە دوای گەڕانەوەی شاندەکان لە ئیسلام ئابادەوە تا ئێستا بەردەوامە، بەڵام جەختی کردەوە ئەو وردەکارییانەی لە میدیا ڕۆژئاواییەکان دەربارەی ناوەڕۆکی دانوستانەکان بڵاو دەکرێنەوە، پشتڕاست ناکەنەوە. 
لە تەوەرێکی دیکەدا، وەزارەتی دەرەوەی ئێران باسی لەوە کرد کە پێدەچێت هەر ئەمڕۆ پێشوازی لە شاندێکی وڵاتی پاکستان بکەن، کە ئەرکی گواستنەوە و ئاگاداربوون لە هەڵوێستی هەردوو لایەنی دانوستانکاریان لەئەستۆ گرتووە.