1 کاتژمێر پێش ئێستا
119 جار خوێنراوەتەوە
بەرەی كاری ئیسلامیی لە ئوردون ناوی خۆی گۆڕی تاوەكو چالاکی و کارەکانى ڕانەگیرێت
پەیام
بەرەی كاری ئیسلامیی لە ئوردون كە خاوەنی زۆرینەی كورسییەكانی پەرلەمانە، بڕیاری دا ناوەكەی بگۆڕێت بۆ "پارتی ئوممە" تاوەكو لەگەڵ یاسای نوێی پەرلەماندا بگونجێت، كە بەكارهێنانی ناوی ئایینی بۆ حیزبە سیاسییەكان قەدەغە دەكات.
گۆڕینی ناوی بەرەی كاری ئیسلامیی لە ئوردون لە كۆنگرەیەكی نائاسایی حیزبەكەدا پەسەند كرا، كە ئامانج لێی گونجاندنی بارودۆخی یاسایی حیزبەكەیە لەگەڵ داواكارییەكانی دەستەی سەربەخۆی هەڵبژاردنەكان.
ئەوەش دوای ئەوەی ئەو پارتە لە دوایین هەڵبژاردندا 31 كورسی لە كۆی 138 كورسی پەرلەمانی ئوردنی بەدەست هێنا و توانای پلەی یەكەمی بەدەست بهێنت.
وائیل سەقا، ئەمینداری گشتیی بەرەی كاری ئیسلامیی لە ئوردون، ڕایگەیاند: گۆڕینی ناوەكە بە واتای دەستبەرداربوون لە ناسنامەی حیزبەكە نایەت، بەڵكو لە سەنگەری خۆی دەمێنێتەوە و هەوڵێكە بۆ بەهێزكردنی ئامادەیی سیاسی لە ژێر چەتری دەستوور و یاسادا.
بەرەی كاری ئیسلامیی لە ئوردون لە مانگی ئایاری داهاتوودا هەڵبژاردنی ناوخۆیی بۆ دیاریكردنی سەركردایەتییەكی نوێ لەژێر ناوی "حیزبی ئوممە" ئەنجام دەدات. داواشی لە حكومەت كرد كە كەشی ئازادییەكان فەراهەم بكات و دۆسیەی دەستگیركراوانی سیاسی یەكلایی بكاتەوە.
لە تۆڕە کۆمەڵایەتیەکان شەیری بکە