پێش 4 هەفتە
239 جار خوێنراوەتەوە
جارێکى دیکە چوارچێوەی هەماهەنگی نەیتوانى کاندیدى سەرۆکوەزیران یەکلابکاتەوە
پەیام
جارێكی دیكە چوارچێوەی هەماهەنگیی لە دیاریكردنی كاندیدێكی هاوبەش شكستی هێنا و، كۆبوونەوەكەی شەوى ڕابردووى بۆ ئەمڕۆ دواخست.
لەگەڵ ئەوەی بڕیار بوو چوارچێوەی هەماهەنگی شیعەكان لە كۆبوونەوەكەیاندا كاندیدی هاوبەش بۆ پۆستی سەرۆكوەزیرانی عێراق یەكلا بكەنەوە، بەڵام دوای كۆبوونەوەکەیان كە لە ماڵی هومام حەموودی بەڕێوە چوو جارێكی دیكە لەو هەنگاوە شكستیان هێنا و هیچ ئەنجامێكیان بوو.
سەركردەكانی شیعە دوای ئەوەی نەیانتوانی كاندیدی سەرۆكوەزیران یەكلا بكەنەوە، كۆبوونەوەكەیان بۆ سبەی ڕۆژی شەممە جارێكی دیكە دواخستەوە.
ئەمە و زۆرێك لە سەركردەكانی چوارچێوەكە داوای دیاریكردنی كاندیدی سەرۆكوەزیرانی عێراق بە دەنگدانی ناوخۆی خۆیان دەكەن، بەڵام هەندێكیان كە كورسیی پەرلەمانییان زۆرە، ئەوە ڕەت دەكەنەوە و بە نادادپەروەریی دەزانن، بەڵكو داوا دەكەن كاندیدەكە بە دەنگدانی ناو پەرلەمانتارانی چوارچێوەی هەماهەنگی یەكلا بكرێتەوە.
بەپێی دەستووری عێراق، دوای 15 ڕۆژ لە هەڵبژاردنی سەرۆككۆمار، دەبێت سەرۆكوەزیران بۆ پێكهێنانی حكومەت ڕابسپێردرێت، بەوپێیەی سەرۆككۆماری عێراق ڕۆژی 11ـی نیسان هەڵبژێردرا، تەنیا یەک ڕۆژ ماوەی دەستووری لەبەردەم لایەنەكانی شیعەدا ماوە بۆ یەكلاكردنەوەی كاندیدی سەرۆكوەزیران و ئەگەر نەتوانن بگەنە ڕێككەوتن ڕەنگە هاوشێوەی یەكێتی و پارتی بە ناكۆییەوە بچنە ناو كێبڕكێی پەرلەمانییەوە بۆ بەدەستهێنانی پۆستەكە.
لە تۆڕە کۆمەڵایەتیەکان شەیری بکە