عێراق وەرگرتنی خێزانەكانی نێو كامپی هۆلی بە فەرمی ڕاگرت

پەیام 

سەرچاوەیەكی ئەمنی عێراقی ڕایگەیاند: حكومەتی فیدراڵ بڕیاری داوە دۆسیەی وەرگرتنی خێزانە عێراقییەكانی نێو كامپی "هۆل" لە سووریا دابخات. 

بەپێی زانیارییەكان، لەم قۆناغەدا هیچ کاروانێکى نوێی خێزانی چەكدارانی داعش ناگەڕێندرێنەوە و پرۆسەكە بە تەواوی ڕاگیراوە، ئەم بڕیارەش وەك هەنگاوێك بۆ پێداچوونەوەی گشتگیر بە ڕێكارە ئەمنییەكان و ڕێكخستنەوەی میكانیزمەكانی وەرگرتنی ئەوان لە داهاتوودا ئەژمار دەكرێت.

سەرچاوەكە ئاماژەی بەوە كردووە، هەر گەڕانەوەیەكی دیكە لە داهاتوودا، پێویستی بە گفتوگۆی فەرمی و ڕێككەوتنی نوێ لەگەڵ حكومەتی سووریا دەبێت. 

حكومەتی عێراقیش جەخت دەكاتەوە، دەبێت هاوسەنگی لە نێوان لایەنی مرۆیی و پێویستییە ئەمنییەكاندا هەبێت، بەتایبەت لە پرسی وردبینی و دووبارە شیاندنەوەی ئەو خێزانانەی كە پەیوەندییان بە داعشەوە هەبووە، تاوەكو سەقامگیری كۆمەڵایەتی و ئاسایشی وڵات بپارێزرێت.

كامپی هۆل یەكێكە لە ئاڵۆزترین دۆسیە ئەمنییەكان كە عێراق لە ساڵانی ڕابردوودا كاری لەسەر كردووە، ئەوەش  لە كاتێكدا كە پێشتر حكومەت پلانی هەبوو هەموو خێزانەكان بگەڕێنێتەوە، بەڵام لەئێستادا بەربەستی نوێ هاتوونەتە پێش. زۆربەی ئەو خێزانانەی گەڕاونەتەوە، بۆ كامپی "جەدعە" نێردراون تاوەكو لە ڕووی دەروونییەوە بۆ تێكەڵبوونەوەیان بە كۆمەڵگە ئامادە بكرێنەوە.