ئێران کەسێکى بە تۆمەتى ئەندامبوون لە گرووپی چەکدار له‌سێداره‌ دا

دەسەڵاتی دادی ئێران بەیانیی ئەمڕۆ یەکشەممە، سزای لەسێدارەدانی بەسەر "عامر ڕامش" دا جێبەجێکرد، کە تۆمەتبار بوو بە ئەندامێتی لە گرووپی "جەیشولعەدل" و ئەنجامدانی هێرشی چەکداری بۆ سەر هێزە ئەمنییەکان لە پارێزگای سیستان و بەلوچستان. 
ماڵپەڕی "میزان ئۆنلاین" ی سەر بە دەسەڵاتی دادی ئێران ڕایگەیاند، عامر ڕامش لە میانی ئۆپراسیۆنێکی دژە تیرۆردا لە ناوچەی "پیرسەهراب" ی سەر بە شاری چابەهار لە پارێزگای سیستان و بەلوچستان دەستگیر کرابوو. هەرچەندە تا ئێستا کاتی وردی دەستگیرکردنەکەی یان مێژووی دەرچوونی سزاکەی ئاشکرا نەکراوە. 
بەپێی زانیارییەکانی دەسەڵاتی دادوەری، ناوبراو بە تۆمەتی "یاخیبوونی چەکداری لە ڕێگەی تەقینەوە و دانانی بۆسە بۆ هێزە سەربازییەکان" و هەروەها ئەندامێتی لە گرووپی "جەیشولعەدل" -کە لە ئێران قەدەغەکراوە- تاوانبار کرابوو. 
دوای ئەوەی پارێزەرەکەی تانەی لە بڕیاری لەسێدارەدانەکەی گرتبوو، دادگای باڵای ئێران حوکمەکەی پەسەند کرد و سەرلەبەیانی ئەمڕۆ سزاکە جێبەجێ کرا. بەپێی ڕاپۆرتێکی ئاژانسی "فرانس پرێس"، ئەمە نوێترین زنجیرە لەو لەسێدارەدانانەی کە لە دوای هەڵگیرسانی جەنگی نێوان ئێران و هاوپەیمانیی ئەمریکا-ئیسرائیل لە ٢٨ی شوباتی ڕابردووەوە، ڕوویان لە زیادبوون کردووە.