وڵاتانی ئەورووپا دەیانەوێت دوور لە ئەمریكا توانا سەربازیەكانیان بەهێز بكەن

پەیام

وڵاتانی ئەورووپا بیر لەوە دەكەنەوە توانا سەربازسیەكانیان بەهێز بكەن و پێویستیان بە ئەمریكا نەبێت، ئەوەش دوای ئەوەی واشنتۆن بڕیاری دا پێنج هەزار سەرباز لە ئەڵمانیا بكشێنێتەوە.

لە ڕاگەیەنراوێكدا لەسەر تۆڕی كۆمەڵایەتی ئێكس ئەلیسۆن هارت، وتەبێژی هاوپەیمانی ناتۆ ڕایگەیاند، ئەوان لە پەیوەندیدان لەگەڵ ئەمریكا تاوەكو لە ڕەهەندەكانی بڕیاری كەمكردنەوەی هێزە ئەمریكییەكان لە ئەڵمانیا تێ بگەن. 

هارت ئاماژەی بەوەش كردووە، كە ئەم هەنگاوەی واشنتۆن پێویستیی وەبەرهێنانی زیاتری ئەورووپا لە كەرتی بەرگریدا دەردەخات، هەر وەك چۆن پێشتر لە ڕێككەوتنی لوتكەی لاهای، كە هاوپەیمانان بڕیاریان دا سەدا پێنجی كۆی بەرهەمی نێوخۆیی بۆ كاروباری سەربازی تەرخان بكەن، تاوەكو ئەوروپایەكی بەهێزتر لە ناو ناتۆیەكی تۆكمەتردا بنیاد بنێن.

لە لایەكی دیكەوە، بۆریس پیستۆریۆس، وەزیری بەرگریی ئەڵمانیا، لە وەڵامی پلانی پاشەكشێی پێنج هەزار سەربازی ئەمریكی لە وڵاتەكەی، ڕایگەیاند دەبێت وڵاتانی ئەوروپا بەرپرسیارێتیی زیاتری ئاسایشی خۆیان بگرنە ئەستۆ. 

پیستۆریۆس جەختی كردەوە ئەڵمانیا لەسەر ڕێگەیەكی ڕاستە بۆ بەهێزكردنی تواناكانی سوپا و خێراكردنی كڕینی چەك و كەرەستەی سەربازی لەگەڵ پەرەپێدانی ژێرخانی بەرگری، تا توانای بەرگری لە خۆی هەبێت.