دوو كه‌شتی جه‌نگی ئه‌مریكا به‌ گه‌رووی هورمزدا په‌ڕینه‌وه‌ و گه‌یشتنه‌ كه‌نداوی عه‌ره‌بی

په‌یام

دوو کەشتیی جەنگیی ئەمریکی دوای ڕووبەڕووبوونەوەی چڕی مووشەکی و درۆنیی ئێران، بە سەرکەوتوویی لە گەرووی هورمز پەڕینەوە و چوونە ناو ئاوی کەنداو، ئەمەش لە چوارچێوەی دەستپێکردنی پلانێکی نوێی واشنتۆن بۆ پاراستنی هاتوچۆی دەریایی.

دوو کەشتیی جەنگیی هێزی دەریایی ئەمریکا لە جۆری "یو ئێس ئێس تروکستۆن" و "یو ئێس ئێس ماسۆن"، بە پاڵپشتیی هێلیکۆپتەرەکانی ئەپاچی و فڕۆکەی جەنگی، لە کاتی تێپەڕبوونیان بە گەرووی هورمزدا ڕووبەڕووی زنجیرەیەک هەڕەشەی هێزەکانی ئێران بوونەوە. بەرپرسانی سەربازی بۆ تۆڕی "سی بی ئێس نیوز" ڕایانگەیاندووە کە ئێران لە ڕێگەی بەلەمی خێرا، مووشەک و فڕۆکەی بێفڕۆکەوانەوە بۆردومانێکی بەردەوامی پاپۆرە ئەمریکییەکانی کردووە.

سەرەڕای توندیی هێرشەکان، هێزەکانی ئەمریکا توانیویانە لە ڕێگەی بەرگریی ئاسمانی و وشکانییەوە هەموو هەڕەشەکان تێکبشکێنن و ڕێگری لە پێکانی کەشتییەکان بگرن. فەرماندەیی ناوەندیی هێزەکانی ئەمریکا (سێنتکۆم) ئاماژەی بەوە کردووە کە ئەم جموجۆڵە هاوکاتە لەگەڵ دەستپێکردنی پلانێکی دۆناڵد ترەمپ بە ناوی "پڕۆژەی ئازادی" کە مەبەست لێی ئاساییکردنەوەی هاتوچۆی کەشتیگەلەکانە لەو گەرووە ستراتیژییەدا.

لەلایەکی دیکەوە، براد کوپەر فەرماندەی فەرماندەیی ناوەندی ڕایگەیاند، دوای ئەوەی هێزەکانی ئێران هێرشیان کردووەتە سەر کەشتییە سەربازی و بازرگانییەکانی ئەمریکا، هێزەکانیان وەڵامیان داونەتەوە و توانیویانە شەش بەلەمی بچووکی ئێرانی تێکبشکێنن. هەروەها جەختی کردەوە کە دوو کەشتیی بازرگانیی ئەمریکی بە سەلامەتی لە گەرووەکە پەڕیونەتەوە و هانی کۆمپانیاکانی دیکەی گواستنەوەش دەدەن بۆ بەردەوامبوون لە چالاکییەکانیان.