"ئێران هاوشێوەی هەرێمی كوردستان، ئیمارات وەك بنكەیەكی دوژمن دەبینێت"

پەیام

پەرلەمانتارێكی ئێران ڕایگەیاند: ئێران، هاوشێوەی هەرێمی كوردستان ئیمارات وەك بنكەیەكی دوژمن پۆلێن دەكات و هەر ساتێك بێت بنكە سەربازییەكانی ناو ئەو وڵاتە دەكاتە ئامانجی هێرشەكانی.

عەلی خزریان، ئەندامی لیژنەی ئاسایشی نیشتمانی لە پەڕلەمانی ئێران، لە دیدارێكی تەلەفزیۆنیدا ئاشكرای كرد، كە سیاسەت و عەقیدەی  سەربازیی وڵاتەكەی بەرانبەر ئیمارات گۆڕانكاری ڕیشەیی بەسەردا هاتووە. 

خزریان ئیماراتی تۆمەتبار كرد بەوەی لە هێرشەكانی ئەمدواییەی سەر ئێراندا بەشداریی ڕاستەوخۆی هەبووە، تەنانەت ئاماژەی بەوە كرد، كە فڕۆكە جەنگییەكانی ئیمارات دوای لادانی ئاڵاكانیان بەشدارییان لە شەڕدا كردووە.

پەڕلەمانتارەكەی ئێران جەختی كردەوە، كە چەمكی "دراوسێیەتی" بۆ ئیمارات كۆتایی هاتووە و هاوكێشە ئەمنییەكەی تاران بۆ هەرێمی كوردستان، لەمەودوا ئەو وڵاتەش دەگرێتەوە. 

ئەندامەكەی لیژنەی ئاسایشی نیشتمانی لە پەڕلەمانی ئێران هەڕەشەی ئەوەیشی كرد، كە سوپای ئێران هەر جموجۆڵێكی دوژمنكارانە لە بنكەكانی نێو ئیمارات هەست پێبكات، هاوشێوەی ئەو هێرشانەی دەكرێنە سەر هەولێر، ڕاستەوخۆ دەیكاتە ئامانج.