ئەمریكا و ئێران جەخت لە بەهێزكردنی پەیوەندییەکانیان لەگەڵ عێراق دەکەنەوە

پەیام

دواى هەڵبژاردنى کابینە نوێیەکەى زەیدى، ئەمریكا و ئێران پیرۆزبایی لێ دەكەن و جەخت لە بەهێزكردنی پەیوەندییە ستراتیژییەكان و سەقامگیریی عێراق دەكەنەوە.

دوای ئەوەی كابینەی حكومەتی نوێ بە سەرۆكایەتی عەلی فالح زەیدی توانی متمانەی پەرلەمان بەدەستبهێنێت، كاردانەوە و پیرۆزباییە نێودەوڵەتی و هەرێمییەكان بۆ بەغدا دەستی پێكرد. هەریەك لە ویلایەتە یەكگرتووەكانی ئەمریكا و كۆماری ئیسلامی ئێران بە فەرمی پشتیوانی خۆیان بۆ قۆناغی داهاتووی عێراق دەربڕی.
تۆماس باراك، باڵیۆزی ئەمریكا لە توركیا، لە پەیامێكدا وێڕای پیرۆزبایی لە عەلی زەیدی، ڕایگەیاند كە واشنتۆن بە پاڵپشتی دۆناڵد ترەمپ و ماركۆ ڕۆبیۆ، چاوەڕوانە لە چوارچێوەی ئەجێندایەكی بوێردا كار لەگەڵ حكومەتی نوێ بكات بۆ خزمەتكردنی بەرژەوەندییە هاوبەشەكان.

لەلایەكی دیكەوە، محەمەد كازم ئال سادق، باڵیۆزی ئێران لە عێراق، هیوای خواست ئەم سەقامگیرییە سیاسییە ببێتە دەستپێكی قۆناغێكی نوێ بۆ گەشەپێدان. ناوبراو جەختی لە بەهێزكردنی پەیوەندییە ستراتیژییەكانی نێوان تاران و بەغدا كردەوە و پشتیوانی وڵاتەكەشی بۆ پاراستنی ئاسایشی ناوچەكە دووپات كردەوە.