ئەنجوومەنی پیرانی ئەمریكا مووچەی ئەندامەكانی لە كاتی پەككەوتنی حكومەت ڕادەگرێت

پەیام

ئەنجومەنی پیرانی ئەمریكا بڕیاری دا لە كاتی پەككەوتنی حكومەتدا مووچەی ئەندامەكانی ڕابگیرێت، تا كۆنگرێس ناچار بێت بەشداری لە بارگرانییە داراییەكاندا بكات.

ئەنجومەنی پیرانی ئەمریكا بە كۆی دەنگ ڕەزامەندی دەربڕی لەسەر بلۆككردنی مووچەی ئەندامانی ئەنجومەنەكە لە كاتی هەر پەككەوتنێكی داهاتووی دامەزراوە حكومییەكاندا. 

جۆن كێنیدی، سیناتۆری كۆماری و خاوەنی پڕۆژەبڕیارەكە ڕایگەیاند، نابێت پەككەوتنی حكومەت ببێتە بژاردەیەكی ئاسایی بۆ چارەسەرنەكردنی ناكۆكییە سیاسییەكان و پێویستە سیناتۆرەكان هەست بەو ئازارە داراییە بكەن كە بەسەر فەرمانبەراندا دێت.

بەپێی بڕیارەكە، هەر كاتێك حكومەت پەكی كەوت و بودجەی دەزگایەك یان زیاتر ڕاگیرا، سكرتارییەتی ئەنجومەن مووچەی سیناتۆرەكان بلۆك دەكات و تەنها كاتێك بۆیان خەرج دەكرێتەوە كە بودجەی حكومەت پەسەند بكرێت و پەككەوتنەكە كۆتایی بێت. 

ئەم هەنگاوە كە پشتگیری هەردوو پارتی كۆماری و دیموكراتی هەیە، دوای زنجیرەیەك پەككەوتنی حكومی دێت كە ساڵی ڕابردوو ڕوویاندا، بەتایبەت پەككەوتنی مانگی تشرینی یەكەمی ڕابردوو، كە بەهۆی ناكۆكی لەسەر بودجەی كەرتی تەندروستی دروست بوو، یاسادانەران پێیان وایە ئەمە وەك سزایەك دەبێت بۆ كۆنگرێس كاتێك لە ئەركە سەرەكییەكانی پەكیدەكەوێت.