ئەمریكا پاداشت بۆ دەستگیركردنی سیخوڕێكی تاران تەرخان دەكات

پەیام

ئێف بی ئای پاداشت بۆ دەستگیركردنی مۆنیكا ویت دادەنێت، كە ئەفسەرێكی پێشووی ئەمریكایە و تۆمەتبار كراوە بە سیخوڕیكردن بۆ ئێران و ئاشكراكردنی نهێنییە سەربازییەكان.

نووسینگەی لێكۆڵینەوەی فیدراڵیی ئەمریكا (FBI) ڕایگەیاند، بڕی 200 هەزار دۆلار وەك پاداشت دەدرێتە هەر كەسێك زانیاریی ورد لەسەر مۆنیكا ویت بدات، كە كارمەندێكی پێشووی هەواڵگریی هێزی ئاسمانی بووە. 

مۆنیكا لە نێوان ساڵانی 1997 تا 2008 لە سوپا كاری كردووە و دواتریش وەك بەڵێندەر تا ساڵی 2010 بەردەوام بووە، كە بەهۆی پلەكەیەوە دەستی بە نهێنییەكی زۆری دەوڵەت گەیشتووە.

بەپێی تۆمەتەكان، مۆنیكا لە ساڵی 2013 بەرەو ئێران هەڵهاتووە و لەوێوە ناوی ڕاستەقینەی چەندین سیخوڕی نهێنیی ئەمریكای بۆ تاران ئاشكرا كردووە. 

ئەم كارەیش مەترسیی گەورەی بۆ سەر گیانی كارمەندە ئەمریكییەكان و خێزانەكانیان لە دەرەوەی وڵات دروست كردووە. 

مۆنیكا ویت لە ساڵی 2019وە لەلایەن دادگای فیدراڵیی واشنتنەوە فەرمانی دەستگیركردنی بۆ دەرچووە، بەڵام تا ئێستا بێسەروشوێنە. هاوكات چوار هاووڵاتیی ئێرانیش لە هەمان دۆسیەدا بە تۆمەتی هاككردن و دزینی زانیاریی ئەلیكترۆنی تۆمەتبار كراون.