ئه‌مڕۆ گه‌ڕێكی دیكه‌ی دانووستانی نێوان لوبنان و ئیسرائیل له‌ واشنتۆن به‌ڕێوه‌ ده‌چێت

ئەمڕۆ لە واشنتن گەڕی سێیەمی دانوستانەکانی نێوان لوبنان و ئیسرائیل بۆ جێگیرکردنی ئاگربەست و ڕاگرتنی خوێنڕشتن دەست پێ دەکات، ئەمەش هاوکاتە لەگەڵ بەردەوامیی هێرشە ئاسمانییەکانی تەلئەبیب کە لە دوایین ئاماردا ٢٢ کوژراوی لێکەوتووەتەوە. 
بڕیارە ئەمڕۆ پێنجشەممە، گەڕێکی نوێی گفتوگۆکانی نێوان لوبنان و ئیسرائیل لە واشنتنی پایتەختی ئەمریکا بەڕێوەبچێت. لایەنی لوبنانی جەخت لەسەر ئەوە دەکاتەوە کە ئامانجی سەرەکییان لەم کۆبوونەوانە "جێگیرکردنی ئاگربەست" و کۆتایهێنانە بەو کوشتار و وێرانکارییەی ڕووبەڕووی وڵاتەکەیان بووەتەوە، بەتایبەت دوای ئەوەی وەزارەتی تەندروستیی لوبنان ڕایگەیاند تەنیا لە هێرشەکانی دوێنێدا ٢٢ کەس گیانیان لەدەستداوە کە ٨یان منداڵن. 
دانوستانەکان بە نێوەندگیریی تیمی نوێی ئیدارەی ئەمریکا بەڕێوەدەچن، کە تێیدا مایک هاکابی، باڵیۆزی ئەمریکا لە ئیسرائیل و میشێل عیسا، باڵیۆزی ئەمریکا لە لوبنان وەک نێوەندگیر بەشدارن. تێبینی دەکرێت کە نە دۆناڵد ترەمپ و نە مارکۆ ڕوبیۆی وەزیری دەرەوە لەم گەڕەی گفتوگۆکاندا ئامادە نابن. 
سەبارەت بە شاندی هەردوو وڵات، لوبنان لە ڕێگەی "سیمۆن کەرەم" ی دیپلۆماتکاری دێرین و پارێزەری سەروەریی وڵاتەکەیەوە نوێنەرایەتی دەکرێت. لە بەرانبەردا، تیمی ئیسرائیلی لەلایەن "یەحیێل لیتەر" ی باڵیۆزیان لە واشنتن سەرۆکایەتی دەکرێت، کە یەکێکە لە کەسایەتییە نزیکەکانی نەتانیاهۆ و پەیوەندییەکی توندوتۆڵی لەگەڵ بزووتنەوەی نیشتەجێبوونی ئیسرائیلی لە کەرتی ڕۆژئاوا هەیە.