ئێران: پەیاممان پێگەیشتووە ئەمریكا خواستی بەردەوامبوونی وتووێژەكانی هەیە

پەیام 

وەزیری دەرەوەی ئێران ڕایگەیاند پەیامی نوێیان لە واشنتنەوە پێگەیشتووە كە ئاماژەی ویستی ئەمریكا بۆ وتووێژی تێدایە، سەرەڕای ڕەتكردنەوەی پێشتری پێشنیارەكانی تاران لەلایەن ترەمپەوە.

لە پەراوێزی كۆبوونەوەی گرووپی "بریكس" لە نیودەلهی، عەباس عەراقچی وەزیری دەرەوەی ئێران ڕایگەیاند، تاران پەیامی نوێی لە واشنتنەوە پێگەیشتووە كە نیشانی دەدەن ئەمریكا خواستی بەردەوامبوونی وتووێژەكانی هەیە. 

عەراقچی ڕوونی كردەوە، ئەو هەواڵانەی باس لە ڕەتكردنەوەی وەڵامەكەی ئێران دەكەن، پەیوەستن بە تویتەكەی چەند ڕۆژ لەمەوبەری ترەمپ كە وەڵامەكەی بە "ناپەسەند" وەسف كردبوو، بەڵام دوای ئەوە پەیامی تریان پێگەیشتووە كە خواستی گفتوگۆ و لێكتێگەیشتنیان هەیە.

سەرەڕای ئەمە، وەزیری دەرەوەی ئێران گومانی خۆی لە جددیبوونی واشنتن لە پرۆسەی دانوستانەكاندا دەربڕی و جەختی كردەوە كە تاران تەنها كاتێك دەگەڕێتەوە سەر مێزی گفتوگۆ كە دڵنیابێتەوە ئەمریكییەكان ئامادەی ڕێككەوتنێكی "دادپەروەرانەن". 

ئەم لێدوانانەی عەراقچی لە كاتێكدایە كە ترەمپ فشاری سەربازی و ئابووری توندی خستووەتە سەر تاران، بەڵام هاوكات دەرگای بۆ دیپلۆماسی و نێوەندگیری وڵاتانی وەك چین هێشتووەتەوە تا بگەنە ڕێككەوتنێكی نوێ كە كۆتایی بە جەنگ و ئاڵۆزییەكانی ناوچەكە بهێنێت.