پێش 4 هەفتە
285 جار خوێنراوەتەوە
ئێران: گەرووى هورمز تەنیا بە ڕووی "دوژمنان"دا داخراوە و بۆ دۆستەكانمان کراوەیە
پەیام
ئێران كارئاسانی بۆ تێپەڕبوونی كەشتیی وڵاتە دۆستەكان لە گەرووی هورمز دەكات و وەزیری دەرەوەی تارانیش جەخت دەكاتەوە كە ڕێڕەوەكە تەنیا بە ڕووی "دوژمنان"دا داخراوە.
تەلەفزیۆنی فەرمی ئێران بڵاوی كردەوە، كە تاران ڕێگەی بە ژمارەیەكی زیاتری كەشتییەكان داوە لە گەرووی هورمز تێپەڕ ببن، ئەمەش دوای جێبەجێكردنی "پرۆتۆكۆڵە یاساییە نوێیەكان" كە لەلایەن سوپای پاسدارانەوە سەرپەرشتی دەكرێن.
بەپێی زانیارییەكان، زیاتر لە 30 كەشتی كە بەشێكیان چینی بوون، توانیویانە لەم ڕێڕەوە ستراتیژییەی وزە تێپەڕ بن.
ئەم هەنگاوە وەك كەمكردنەوەی فشارەكان لەسەر جووڵەی دەریاوانی لە جیهاندا دەبینرێت، هەرچەندە كۆمەڵگەی نێودەوڵەتی داوای هەڵگرتنی تەواوەتی كۆتوبەندەكان دەكات.
هاوكات، عەباس عەراقچی، وەزیری دەرەوەی ئێران لە پەراوێزی كۆبوونەوەی گرووپی "بریكس" لە نیودەلهی ڕایگەیاند، گەرووی هورمز تەنها بەڕووی "دوژمنان"دا داخراوە و هەموو وڵاتە دۆستەكان دەتوانن كەشتییەكانیان تێیدا ڕەوانە بكەن.
ئاماژەی بەوەش كرد، تاران ئاسانكاری بۆ ئەو وڵاتانە دەكات كە پابەندی ڕێكارە یاساییەكانی ئەوان دەبن.
لە تۆڕە کۆمەڵایەتیەکان شەیری بکە