سەرەڕای ڕێگرییەكان، 75 هەزار فەڵەستینی نوێژی هەینییان لە ئەقسا كرد

پەیام

لە یادی داگیركردنی قودسدا جولەكە ڕاستڕەوەكان ئاهەنگێكی دنەدانیان لەبەردەم دەروازەكانی ئەقسا ساز كرد،  سەرەڕای ڕێگرییەكانیش، 75 هەزار فەڵەستینی نوێژی هەینییان لە یەكەمین ڕووگەی موسوڵمانان كرد.

ئەمڕۆ هەینی، بەبۆنەی یادی ساڵانەی داگیركردنی قودسی ڕۆژهەڵات بەپێی ساڵنامەی عیبری، كۆمەڵێك لە ئیسرائیلییە ڕاستڕەوەكان بە سەرۆكایەتی حاخام ئیسرائیل ئاریێل، ئاهەنگێكی دنەئامێزیان لەبەردەم "دەروازەی ئەسبات" ی مزگەوتی ئەقسا ساز كرد. 

بەشداربووان ئاڵای "پەرستگای گومانلێكراو"یان بەرز كردەوە و لەژێر پاراستنی هێزە ئەمنییەكاندا سەما و گۆرانییان نزیك شوێنە پیرۆزەكان ئەنجام دا.

هاوكات پۆلیسی قەوارەكە دەروازەكانی ئەسبات و مەلیك فەیسەڵیان بەڕووی گەنجانی فەڵەستینیدا داخستبوو، بەڵام سەرەڕای ئەوەیش نزیكەی 75 هەزار نوێژخوێنی فەڵەستینی توانییان نوێژی هەینی لەناو مزگەوتی ئەقسا ئەنجام بدەن.

بۆ دابینكردنی ئاسایشی نیشتەجێیە توندڕەوەكانیش، پۆلیسی ئیسرائیل نزیكەی 14 هەزار كارمەندی لە قودس بڵاو كردەوە و شارەكەی بۆ سەربازگەیەك گۆڕی. 

ئەم ئاڵۆزییانە دوای ئەوە دێت كە دوێنێ پێنجشەممە، ئییتامار بن غەفیر، وەزیری ئاسایشی نەتەوەیی ئیسرائیل لەگەڵ زیاتر لە هەزار نیشتەجێی توندڕەو هەڵیانكوتایە سەر حەوشەكانی ئەقسا و دنەی موسوڵمانیان دایەوە.