1 کاتژمێر پێش ئێستا
105 جار خوێنراوەتەوە
ئێران لەڕێى دادگای لاهایەوە هەوڵی دەستبەسەرداگرتنی سەرمایەكانی ئەمریکا دەدات
پەیام
ئێران تۆماركردنی 250 هەزار سكاڵای یاسایی دژ بە ئەمریكا و ئیسرائیل ڕادەگەیەنێت و لە دادگای لاهای هەوڵی دەستبەسەرداگرتنی سەرمایەكانی واشنتن دەدات بۆ قەرەبووكردنەوەی زیانەكان.
بەرپرسێكی باڵای دەسەڵاتی دادوەریی ئێران ئاشكرای كرد، كە نزیكەی 250 هەزار سكاڵای یاسایی و سزایی سەبارەت بە "تاوانەكانی جەنگی ئەمریكا و ئیسرائیل" لە دادگاكانی وڵاتەكەدا تۆماركراون و لە ژێر لێكۆڵینەوەدان.
عەبدولسەمەد میرحوسێنی، جێگری دادگای گشتی ڕایگەیاند، لقە تایبەتەكانی دادگا سەرقاڵی وردبینیكردن و بەبەڵگەكردنی ئەم دۆسیانەن، كە پەیوەستن بەو زیانە گیانی و ماددیانەی بەهۆی هێرش و سزاكانی واشنتن و تەلئەبیبەوە بەر هاووڵاتیانی ئێرانی كەوتوون.
هەروەها ئاماژەی بەوە كرد، كە ئێران لە دیوانی ناوبژیوانی لاهای لە هۆڵەندا، سكاڵایەكی فەرمی دژ بە ئەمریكا تۆماركردووە.
تاران هیوادارە لە ڕێگەی ئەم هەوڵە یاساییانەوە و بە پشتبەستن بە بەیاننامەكانی جەزائیر، بتوانێت دەست بەسەر سەرمایە و داراییەكانی ئەمریكادا بگرێت وەك قەرەبوویەك بۆ زیانلێكەوتووان.
ئەم هەنگاوە لە كاتێكدایە كە ئێران چەندین جار ئەمریكا و ئیسرائیلی بە ئەنجامدانی هێرشی سەربازی و تێكدانی ئاسایشی وڵاتەكەی تۆمەتبار كردووە، بەڵام تا ئێستا وردەكاری زیاتری لەسەر ناوەڕۆكی سكاڵاكان بڵاو نەكردووەتەوە.
لە تۆڕە کۆمەڵایەتیەکان شەیری بکە