بەهۆى قەرزەوە، عێراق دەست بەسەر ماڵ و سامانی كۆمپانیای كۆڕەك دەگرێت

پەیام

عێراق دەستبەسەرداگرتنی ماڵ و سامانی كۆمپانیای كۆڕەك تیلیكۆمی ئاشكرا كرد و ڕایگەیاند: كۆمپانیاكە لە ئێستادا توانای نییە پابەندییە داراییەكانی بەرانبەر حكومەت جێبەجێ بكات.

بەلیغ ئەبو كەللەل، سەرۆكی جێبەجێكاری دەستەی ڕاگەیاندن و پەیوەندییەكانی عێراق لە بەرنامەیەكی تەلەفزیۆنیدا چەند خاڵێكی پەیوەست بە گرفتە یاساییەكانی كۆمپانیای كۆڕەك تلیكۆم ئاشكرا كرد و ڕایگەیاند: هیچ بڕە پارەیەكی شایستەی كۆڕەك لای دەستەكە نییە و هەر بڕیارێكیش لە دادگا ناتایبەتمەندەكانەوە دەرچوو بێت، بەهای یاسایی نییە.

ئەبو كەللەل ڕایشیگەیاند: دەستەكە دەستی بەسەر سەرجەم ماڵ و سامانە گوازراوە و نەگوازراوەكانی كۆمپانیاكەدا گرتووە و داوا لە بانكەكان كراوە شایستە داراییەكانی سێ ساڵی ڕابردوویشی ڕادەستی دەستەكە بكەن.

ئەبو كەللەل ڕایشیگەیاند: لە ئێستاشدا كۆڕەك خاوەنی سەروەت و سامانێكی ئەوتۆ نییە كە بەشی دانەوەی قەرز و پابەندییە داراییەكانی بكات و دۆسیەی پاكتاوی قەرزەكانی كۆمپانیاكەش بە ئاگاداری لایەنە فەڕمییەكانی وەك دەستەی دەستپاكی، دیوانی چاودێری دارایی، ئەمیندارێتی گشتی ئەنجوومەنی وەزیران و لیژنەیەكی تایبەت بە فەرمانی سەرۆكوەزیران، بەڕێوە چووە.

كۆمپانیای كۆڕەك خاوەندارێتییەكەی بۆ سیروان بارزانی برازای مەسعوود بارزانی سەرۆكی پارتی دیموكراتی كوردستان دەگەڕێتەوە، بەهۆی پابەندنەبوونە داراییە یاساییەكانی لە ئاداری 2019ەوە لەلایەن دەستەی ڕاگەیاندن و پەیوەندییەكانی عێراقەوە سزای بەسەردا دراوە و دواتریش پەیوەندییەكانی لەگەڵ تۆڕەكانی دیكە ڕاگیرا.