حەموودی: هیچ هاوپەیمانییەك لە دەرەوەی چوارچێوەی هەماهەنگی قبوڵ ناكرێت

پەیام

سەرۆكی ئەنجومەنی باڵای ئیسلامی عێراق، ڕایدەگەیەنێت: یەكڕیزیی چوارچێوەی هەماهەنگی هێڵی سوورە و هیچ هاوپەیمانییەك لە دەرەوەی ئەم لایەنە قبوڵ ناكرێت. 

هومام حەموودی، سەرۆكی ئەنجومەنی باڵای ئیسلامی عێراق لە لێدوانێكدا كە ئاژانسی هەواڵی عێراق بڵاوی كردووەتەوە ڕایگەیاند: شتێك بە ناوی "هاوپەیمانیی بەهێزەكان" لەئارادا نییە و چوارچێوەی هەماهەنگی وەك "هێڵی سوور" دەمێنێتەوە. 

ناوبراو ئاماژەی بەوە كرد "هەر لایەنێك لەم چوارچێوەیە بچێتە دەرەوە، یان هەوڵی دروستكردنی هاوپەیمانیی دیكە بدات خۆی زیانمەند دەبێت؛ وتیشی: یەكبوونی چوارچێوە لە بەرژەوەندییە كاتییەكان بەهێزترە و ڕێگە بە هیچ هەوڵێكی میدیایی بۆ تێكدانی ئەم یەكڕیزییە نادرێت. 

سەبارەت بە پێكهێنانی حكومەت، سەرۆكی ئەنجومەنی باڵای ئیسلامیی عێراق ڕایگەیاند: تەواوكردنی كابینەی وەزاری دەبێت سەرەتا لە ڕێگەی ڕێككەوتنی نێوان هێزەكانی چوارچێوەی هەماهەنگییەوە تێپەڕ ببێت و نابێت هەڵەكانی ڕابردوو دووبارە بكرێنەوە. وتیشی: هەر هەنگاوێك لە دەرەوەی چوارچێوەی هەماهەنگی نەبوونی "واقیعییەتی سیاسی" پێوە دیارە.

هەر وەك داوای لە ئەنجوومەنی نوێنەرانیش كرد بەرپرسیارێتی تەواو بۆ چاودێریكردنی وردی كارەكانی حكومەت لەم قۆناغە هەستیارەدا لە ئەستۆ بگرێت.