زەیدى گوێ لە گرووپە چەکدارەکان ناگرێت و دەڵێت دەبێت چەک بە دەستی دەوڵەتەوە بێت

پەیام

دوابەدوای هەڵوێستی یەكێك لە گرووپە چەكدارییەكان بە دژایەتی چەكدانان، سەرۆكوەزیرانی عێراق پێداگریی لە جێبەجێكردنی پڕۆژەی چەك بە دەستی دەوڵەت دەكاتەوە.

عەلی زەیدی سەرۆكوەزیرانی عێراق دوێنێ پێشوازی لە ژمارەیەك لە سەرۆكهۆز كەسایەتییە دیارەكان كرد كە بۆ پیرۆزبایی جەژن سەردانییان كردبوو.

لە وتەیەكیدا كە نووسینگەی ڕاگەیاندنەكەی بڵاوی كردووەتەوە "سەرۆكوەزیرانی عێراق جەختی لە پێداگریی حكوومەت لەسەر جێبەجێكردنی پڕۆژەی سنوورداركردنی چەك بە دەستی دەوڵەت كردەوە".

زەیدی ڕایشیگەیاندووە: ڕێ بە پێشێلكردنی یاسا نادەین و هێز و سەروەریی عێراق بەهێز دەكەین.

لە بەشێكی دیكەی قسەكانیشیدا زەیدی پاڵپشتی بۆ هۆزەكان دەربڕیوە و ڕایشیگەیاندووە: هۆزەكان هەر لە سەرەتای دامەزراندنی دەوڵەتی عێراقەوە پشتیوانیی بوون و لە خراپترین دۆخەكانیدا پاڵپشتییان لێ كردووە.

لێدوانەكەی سەرۆكوەزیرانی عێراق لەبارەی بوونی چەك بە دەستی دەوڵەتەوە لەكاتێكدایە، سەرایای ئەولیئوددەم وەك یەكێك لە گرووپەكانی موقاوەمەی عێراق بە فەرمی ڕایگەیاند، ئامادە نییە چەك ڕادەستی دەوڵەت بكات و ڕایگەیاند: تاوەكو دەركردنی دواین سەربازی ئەمریكی لە خەباتی چەكداری بەردەوام دەبن.