ترەمپ: مەرجی كشانەوەمان كردنەوەی گەرووی هورمز و كۆتاییهاتنی ئەتۆمی ئێرانە

پەیام

دۆناڵد ترەمپ ڕایگەیاند، لە ڕێككەوتنێكی زۆر باش لەگەڵ تاران نزیكبوونەتەوە، كشانەوەی هێزەكانی ئەمریكایش لە ناوچەكە، بە كردنەوەی دەستبەجێی گەرووی هورمز و كۆتاییهێنان بە دۆسیەی ئەتۆمیی ئێران دەبەستێتەوە.

سەرۆكی ئەمریكا لە چاوپێكەوتنێكدا لەگەڵ كەناڵی "فۆكس نیوز" جەختی كردەوە، بژاردەی دیپلۆماسی باشترین ڕێگەیە و ئێستا نزیكن لە ڕێككەوتن. وتیشی: واژووكردنی ڕێككەوتنەكە بەواتای كردنەوەی ڕاستەوخۆی گەرووی هورمز دێت بە ڕووی كەشتیوانیدا، بەبێ وەرگرتنی هیچ باجێكی تێپەڕین.

ترەمپ جەختی كردەوە، دەبێت تاران بە شێوەیەكی یەكجاری لە خاوەندارێتی چەكی ئەتۆمی بێبەش بكرێت و، تەنیا دوای جێبەجێكردنی ئەم مەرجانە ئەمریكا هێزەكانی لە ناوچەكە دەكێشێتەوە و كۆتایی بەو گەمارۆیە دەهێنێت كە خستوویەتیە سەر ئێران.

لە لایەكی دیكەوە ماڵپەڕی "ئەكسیۆس"ـی ئەمریكی لە زاری بەرپرسێكی ئەمریكییەوە بڵاوی كردەوە، داواكارییە نوێیەكانی ترەمپ بوونەتە هۆی دەستپێكردنی گەڕێكی دیكەی گفتوگۆ و ئاڵوگۆڕی پەیامەكان لەنێوان واشنتن و تاراندا، هەرچەندە ئەو بەرپرسە دڵنیایی دا كە ڕێككەوتنەكە ئەنجام دەدرێت، بەڵام ئاماژەی بەوە كرد، وادەی فەرمیی واژووكردنی هێشتا یەكلا نەكراوەتەوە و هەردوولا سەرقاڵی وردەكارییە كۆتاییەكانن.