سکرتێرێکى سوودانى بە تۆمەتى تێوەگلان لە گەندەڵى دەستگیرکرا

پەیام

هێزێكی ئەمنیی تایبەت "حەسەنێن سوودانی"، فەرمانبەری سكرتارییەتی سەرۆكوەزیرانی پێشووی عێراقیان بە تۆمەتی تێوەگلان لە دۆسیەیەكی "مەترسیداری" گەندەڵی دەستگیر كرد. 

سەرچاوە ئاگادارەكان ئاماژەیان بەوە كرد، كە دەستگیركردنی حەسەنێن سوودانی بەرەبەیانی ئەمڕۆ یەكشەممە و لەسەر بنەمای فەرمانی فەرمیی دادوەر ئەنجام دراوە.

ئەم هەنگاوە وەك بەشێك لەو هەڵمەتە فراوانەی عەلی زەیدی، سەرۆكوەزیرانی ئێستای عێراق دەبینرێت، كە دژی گەندەڵی و بۆ ڕاوەدوونانی ئەو بەرپرسانە دەستی پێكردووە كە لەسەر حسابی سامانی گشتی سوودمەند بوون؛ بڕیاریش دراوە لێكۆڵینەوەی ورد لە تەواوی ئەو گرێبەستە گەورانە بكرێت كە لە ڕابردوودا لە وەزارەتەكاندا واژۆ كراون. 

ئەم دەستگیركردنە دوای ئەوە دێت، كە دوێنێش هێزە ئەمنییەكان "عەدنان جومەیلی"، بریكاری وەزارەتی نەوتیشیان بە تۆمەتی هاوشێوە دەستبەسەر كرد. حكومەتی نوێی عێراق جەختی كردووەتەوە، كە ئامانجیان دەستنیشانكردنی هەموو ئەو كەس و لایەنانەیە كە زیانیان بە دارایی دەوڵەت گەیاندووە و چاوەڕێ دەكرێت ڕۆژانی داهاتوو ژمارەیەكی بەرپرسی دیكەش دەستگیر بكرێن.