ئاژانسی وزەی ئەتۆم: وێستگەیەکی ئەتۆمی کراوەتە ئامانج و ئەوەش یاریکردنە بە ئاگر

ئاژانسی نێودەوڵەتیی وزەی ئەتۆم ڕایگەیاند، فڕۆکەیەکی بێفڕۆکەوان وێستگەی ئەتۆمیی زاپۆریژیای لە باشووری ئۆکرانیا کردووەتە ئامانج، هاوکات مۆسکۆ و کیێڤیش تۆمەتی هێرشەکە دەخەنە ئەستۆی یەکتر. 
پشکنەرانی ئاژانسی نێودەوڵەتیی وزەی ئەتۆم لەناو وێستگەکە، زیانیان لە بەشی دەرەوەی باڵەخانەی تۆرباینەکان بەدی کردووە. ئاژانسەکە دووپاتی کردەوە ئاستی تیشکدانەوە لە ناوچەکەدا هێشتا سروشتییە و هیچ مەترسییەک دروست نەبووە، بەڵام ڕافائیل گرۆسی، بەڕێوەبەری ئاژانسەکە، هۆشداریی دا و ڕایگەیاند هێرشکردنە سەر دامەزراوە ئەتۆمییەکان وەک "یارییکردن بە ئاگر" وایە. 
لەلایەکی دیکەوە، کۆمپانیای "رۆس ئەتۆم" بۆ وزەی ئەتۆم، ئۆکرانیای بە ئەنجامدانی هێرشێکی بەئەنقەست تۆمەتبار کرد و ڕایگەیاند درۆنەکە زیانی بە دیوارێکی ژووری تۆرباینەکان گەیاندووە، بەڵام ئامێرە سەرەکییەکان سەلامەتن. 
هاوکات وەزارەتی دەرەوەی ئۆکرانیا ڕەتیکردەوە کە هیچ پەیوەندییەکی بەو هێرشانەوە هەبێت و ڕایگەیاند، ئەم بانگەشانەی ڕووسیا دوورن لە لۆژیکەوە، چونکە کیێڤ هەرگیز وێستگەیەکی ئەتۆمی سەر بە خاکی خۆی ناکاتە ئامانج کە هەوڵی گێڕانەوەی سەروەرییەکەی دەدات. 
وێستگەی زاپۆریژیا کە گەورەترین وێستگەی ئەتۆمییە لەسەر ئاستی ئەوروپا، لە سەرەتای هێرشەکانی ساڵی ٢٠٢٢ەوە لەژێر کۆنترۆڵی هێزەکانی ڕووسیادایە.