عێراق ڕێوشوێنه‌كانی وه‌رگرتنی به‌رهه‌می گه‌نمی ئه‌مساڵ توندتر ده‌كاته‌وه‌

کۆمپانیای گشتیی بازرگانیی دانەوێڵەی عێراق دەستپێکردنی دابەشکردنی زیاتر لە تریلیۆنێک و ٥٠٠ ملیار دیناری وەک شایستەی دارایی ساڵی ڕابردووی گەنم بەسەر جوتیاراندا ڕاگەیاند، هاوکات ڕێوشوێنەکانی وەرگرتنی بەرهەمی ئەمساڵیشی توندتر دەکات.
حەیدەر نووری ئەلکرعاوی، بەڕێوەبەری گشتیی کۆمپانیای گشتیی بازرگانیی دانەوێڵە (سەر بە وەزارەتی بازرگانی)، لە کۆنگرەیەکی ڕۆژنامەوانیدا ڕایگەیاند کە کۆمپانیاکەیان دەست دەکات بە دابەشکردنی شایستە داراییەکانی جوتیاران بۆ وەرزی پێشووی گەنمی ساڵی ٢٠٢٥، کە بڕەکەی دەگاتە تریلیۆنێک و ٥٤٥ ملیار دینار. ئاماژەی بەوەش کرد کە دوای ڕێنمایی سەرۆک وەزیران بۆ خەرجکردنی ئەو بڕە پارەیە، ئێستا چاوەڕوانی وەزارەتی دارایی دەکەن بۆ خه‌رجكردنی بودجەکە.
ئەم ڕاگەیاندنە لە دوای کۆبوونەوەیەکی بەرفراوانی کۆمپانیاکە لەگەڵ لیژنەی ناوەندیی بەبازاڕکردن هات، کە تێیدا تاووتوێی بەڕێوەچوونی پرۆسەی وەرگرتنی گەنمی وەرزی ئێستای ٢٠٢٦ کرا. وەزارەتی بازرگانی ڕوونی کردەوە کە کۆبوونەوەکە تیشکی خستووەتە سەر چەندین پرسی تەکنیکی و کارگێڕی بە ئامانجی ئاسانکاری بۆ جوتیاران، کەمکردنەوەی قەرەباڵغی لە سایلۆکان و خێراکردنی ڕاییکردنی مامەڵەکانیان.
لە بەشێکی تری کۆبوونەوەکەدا، ئەلکرعاوی جەختی لە توندکردنەوەی چاودێری لە بازگەکاندا کردەوە بۆ ڕێگریکردن لە گواستنەوەی نایاسایی گەنم لە نێوان پارێزگاکاندا. هەروەها جەختی لە پێویستی پابەندبوونی تەواو بە پشکنینی تاقیگەیی بۆ بەرهەمە وەرگیراوەکان کردەوە، بە جۆرێک کە هاوتای مەرج و پێوەرە پەسندکراوەکان بێت، ئەمەش لەپێناو پاراستنی کوالێتی گەنمەکە و سەرخستنی وەرزی بەبازاڕکردنی ئەمساڵ.