ئه‌ورووپا.. داوای به‌ ئه‌ندامبوونی كه‌نه‌دا و وڵاتانی به‌لقان له‌ یه‌كێتی ئه‌ورووپا ده‌كرێت

په‌یام
ئەلێکساندەر ستوب، سەرۆکی فینلەندا پێشنیازی فراوانکردنی یەکێتیی ئەورووپا بۆ چل دەوڵەت دەکات و داوای بەئەندامبوونی کەنەدا و چەند وڵاتێکی دیکەی ناوچەکە دەکات. 
ئەلێکساندەر ستوب، سەرۆکی فینلەندا لە میانەی بەشدارییکردنی لە کۆنفرانسێکی تایبەت بە وزە لە وڵاتەکەی، ڕایگەیاند پێویستە لەم قۆناغەدا بە دیدێکی فراوان بیر بکەنەوە. ئاماژەی بەوەش کرد کە پێویستە یەکێتیی ئەورووپا گەشەی پێبدرێت یان لانیکەم میکانیزمێکی نەرمی بەئەندامبوون دابڕێژرێت کە بتوانێت چل دەوڵەتی ئەورووپی و تەنانەت دەرەوەی ئەورووپاش لەخۆ بگرێت. 
سەرۆکی فینلەندا هۆشداریی دا لەوەی دەرفەتی فراوانکردنی یەکێتییەکە زۆر کورتە، چونکە لە دوای کۆتاییهاتنی ململانێکانی ئۆکرانیا و ئەگەری گۆڕانی ئیدارەی ئەمریکا، پرسی فراوانبوون پشتگوێ دەخرێت و خەڵکی باسی مژاری دیکە دەکەن. لەم چوارچێوەیەشدا، ستوب بە تایبەتی ناوی هەریەکە لە بەریتانیا، نەرویج، ئایسلەندا و وڵاتانی ڕۆژئاوای بەڵکانی هێنا و وەک گەرمترین ناوچەکانی ئەورووپا ناوزەندی کردن. 
لە بەشێکی دیکەی قسەکانیدا، ستوب جەختی لەوە کردەوە کە دوای لێکۆڵینەوە لە ئەگەری بەئەندامبوونی ئۆکرانیا، مۆڵدۆڤا و جۆرجیا، دەبێت وڵاتانی یەکێتییەکە بە جدی سەیری پرسی تورکیاش بکەن. 
هاوکات پێشنیازی کرد کەنەدایش وەک بژاردەیەکی دیکە سەیر بکرێت، بە تایبەت لە دوای هەڕەشەکانی دۆناڵد ترەمپ، سەرۆکی ئەمریکا بۆ سەر ئەو وڵاتە. ستوب بە شێوازێکی تەنزئامێز وتی: "ئایا ئەوە زۆر ناوازە نابێت کەنەدا لەبری ئەوەی ببێتە ویلایەتی پەنجاو یەکی ئەمریکا، ببێتە ئەندامی بیستوهەشتی یەکێتیی ئەورووپا؟ ".