جەنگ و ململانێكان ملیۆنان كەسیان لە جیهاندا ڕووبەڕووی برسییەتی كردووەتەوە

پەیام

بەرنامەی جیهانیی خۆراك هۆشداری دەدات كە شەڕی ڕۆژهەڵاتی ناوەڕاست و ئێران، ملیۆنان كەسی ڕووبەڕووی برسییەتی كردووەتەوە و نرخی خۆراكی بەرز كردووەتەوە.

بەرنامەی جیهانیی خۆراكی سەر بە نەتەوە یەكگرتووەكان ڕایگەیاند، ململانێكانی ڕۆژهەڵاتی ناوەڕاست و كاریگەرییەكانی جەنگی سەر ئێران، ملیۆنان كەسیان بەرەو هەژاری و برسییەتی بردووە و بەهۆی بەرزبوونەوەی تێچووی سووتەمەنی و گواستنەوە، نرخی كاڵا و ماددە خۆراكییەكان لە ئاستی جیهاندا بە شێوەیەكی بەرچاو زیادی كردووە.
بەپێی ڕاپۆرتەكە، خێزانەكان لە ئەفغانستان، سۆماڵ و سریلانكا زۆرترین زیانیان بەركەوتووە و پێشبینی دەكرێت لە ساڵی 2026 دا، 6 ملیۆن و 500 هەزار كەس لە سۆماڵ (كە دەكاتە سێیەكی دانیشتووانەكەی) و 17 ملیۆن و 400 هەزار كەس لە ئەفغانستان تووشی قەیرانی برسییەتییەكی توند بن. 

بەرنامەی جیهانیی خۆراك ئاماژەی بەوەش كردووە، بەهۆی خراپیی بارودۆخەكەوە لە ساڵی 2026 دا ژمارەی ئەو كەسانەی كە سودمەند دەبن لە هاوكارییەكان یەك ملیۆن و 500 هەزار كەسی دیكەی لێ كەم دەبێتەوە و، هۆشداری داوە ئەگەر دۆخەكە بەم شێوەیە بۆ شەش مانگی دیكە بەردەوام بێت، ژمارەی ئەو كەسانەی لە هاوكارییەكان بێبەش دەبن دەگاتە 9 ملیۆن كەس.