ئیدارەی ترەمپ تاووتوێ لێخۆشبوون بۆ سزاكانی كڕینی نەوتی ڕووسیا دەكات

پەیام

سكۆت بێسێنت، وەزیری خەزێنەی ئەمریكا رایگەیاند: ئەگەری هەیە لە داهاتوودا ئیدارەی دۆناڵد ترەمپ بەخشینی نوێ لە سزاكانی كڕینی نەوتی ڕووسیا بۆ وڵاتان بەجیا دەربكات. 

بێسێنت ئاماژەی بەوە كرد، ویستی ئەوەیان هەیە ئەم بەخشینانە بەپێی بارودۆخی هەر وڵاتێك بەجیا ڕێكبخرێن و، بەشێوەیەكی گشتی بۆ هەمووان نەبێت، ئەمەش بۆ كۆنترۆڵكردنی باشتر و كەمكردنەوەی سوودەكانی مۆسكۆیە.

وەزیری خەزێنە لەبەردەم ئەنجومەنی نوێنەران روونیكردەوە، ڕووسیا لە رێگەی ئەم جۆرە بەخشینانەوە داهاتێكی زۆر كەمی دەستكەوتووە، چونكە پێشتر نەوتەكەی تەنها بۆ وڵاتی چین دەچوو، وتیشی: ئێستاش ئیدارەی ترەمپ دەیەوێت لە ڕێگەی ئەم هەنگاوانەوە ڕێگە بدات هاوپەیمانەكانی ئەمریكا سوود لەو وزەیە وەربگرن بۆ ئەوەی باری ئابوورییان جێگیر بێت و تووشی قەیرانی وزە نەبن.

ئەم بڕیارە لە كاتێكدایە، ئیدارەی ترەمپ دوو جار بەخشینی كاتیی لە سزاكانی سەر نەوتی ڕووسیا درێژكردووەتەوە، ئەوەش بەهۆی بەرزبوونەوەی نرخەكانی وزە لە بازاڕە جیهانییەكاندا بەهۆی جەنگی ڕۆژهەڵاتی ناوەڕاست و داخستنی گەرووی هورمزە لەلایەن ئێرانەوە، كە ئەو گەرووە ستراتیژییە پێنجیەكی دابینكردنی پێداویستییە جیهانییەكانی نەوت و غازی پێدا تێدەپەڕێت و كاریگەری لەسەر ئاسایشی وزەی جیهان هەیە.