وەزارەتی کارەبا: ئاستی بەرهەمهێنان ٢٢ هەزار مێگاواتە و هێشتا کورتهێنانی گەورە هەیە

وەزارەتی کارەبای عێراق ڕایگەیاند ئاستی ئێستای بەرهەمهێنانی وزە گەیشتووەتە ٢٢ هەزار مێگاوات و دابەشکردنی پشکەکانیش لە نێوان پارێزگاکاندا بەپێی سیستمێکی ورد ئەنجام دەدرێت. 
وەزارەتی کارەبا ئاشکرای کرد کە پشکی پارێزگاکان لە دوای جیاکردنەوەی پێداویستیی نەخۆشخانە حکومییەکان، وێستگەکانی ئاو و قەرەبووکردنەوەی بەفیڕۆچوونەکان دیاری دەکرێت.

بەپێی ڕێژە پەسەندکراوەکانی دەستەی باڵای هەماهەنگی، پارێزگای بەسڕە پشکی تایبەتی خۆی وەردەگرێت و پاشماوەی وزەکەش بەسەر ناوچەکانی تردا دابەش دەکرێت؛ بە جۆرێک بەغداد ٢٧. ٠٧٪، زیقار ٩. ٠٢٪، نەینەوا ٨. ٤٧٪، و کەرکووک ٥. ٢١٪ی بەر دەکەوێت، لە کاتێکدا پارێزگاکانی وەک بابل، کەربەلا، نەجەف و ئەنبار ڕێژەی نزیکەی ٥. ٥٪یان بۆ تەرخان کراوە تاوەکو دادپەروەری لە دابەشکردنی کارەبادا بپارێزرێت. 
ئەم ئامارە نوێیە نیشانەی پاشەکشەی ئاستی بەرهەمهێنانە، چونکە نیسانی ساڵی ڕابردوو عێراق ٢٧ هەزار مێگاوات کارەبای بەرهەم دەهێنا. بۆ گەیشتن بە خۆبژێوی و دابینکردنی کارەبای ٢٤ کاتژمێری بۆ هاووڵاتیان، وڵات لە کاتەکانی لوتکەی بەکاربردندا پێویستی بە ٣٧ هەزار بۆ ٥٠ هەزار مێگاوات وزە هەیە؛ ئەمەش دەریدەخات کە هێشتا بۆشاییەکی گەورە لە نێوان بەرهەمهێنان و پێداویستیی ڕاستەقینەی خەڵکدا ماوە و سیستمەکە پێویستی بە وەبەرهێنانی زیاتر هەیە بۆ ڕێگریکردن لە پچڕانی بەردەوامی کارەبا لە وەرزی گەرمادا.