ترەمپ یادی 80 ساڵەی بە خەرجكردنی 60 ملیۆن دۆلار دەكاتەوە

پەیام

سەرۆكی ئەمریكا بە تەرخانكردنی بڕی 60 ملیۆن دۆلار بۆ ئەنجامدانی یارییە جەنگییەكانی "ئێم ئێم ئەی" لە نێو حەوشەی كۆشكی سپی بۆ یادی لەدایكبوونی خۆی، ڕووبەڕووی ڕەخنە دەبێتەوە. 

دۆناڵد ترەمپ، وەك بەتەمەنترین سەرۆكی ئەمریكا، بڕیاری دا یادی 80 ساڵەی تەمەنی بە شێوازێكی جیاواز بكاتەوە و میوانداریی یارییەكانی "یو ئێف سی فریدەم 250" بكات كە تایبەتن بە یاریە بەرگرییە ئازادەكان.

بۆ ئەم مەبەستە، قەفەسێكی گەورەی شەڕكردن لە نێو حەوشەی كۆشكی سپیدا دروست كراوە و 14 ئەستێرەی جیهانیی یارییەكە تێیدا ڕكابەری دەكەن.

ئەم بۆنەیە كە 60 ملیۆن دۆلاری بۆ تەرخان كراوە، هاوكاتە لەگەڵ یادكردنەوەی 250 ساڵەی سەربەخۆیی ئەمریكا و لە نێو حەوشەی كۆشكی سپیدا جێگەی دانیشتن بۆ زیاتر لە چوار هەزار بینەر دابین كراوە. 

ئەم نمایشە گەورەیە شەپۆلێكی توندی ڕەخنەی لای نەیارانی ترەمپ دروست كردووە، چونكە پێیان وایە لە كاتی جەنگی ئێران و بەرزبوونەوەی نرخەكاندا، خەرجكردنی ئەو بڕە پارە زۆرە بۆ ئاهەنگگێڕان كارێكی نەگونجاوە، لە بەرانبەردا ترەمپ بە نمایشێكی "بێوێنە" وەسفی دەكات كە گەنجان پێی سەرسام دەبن، هاوكات پێشبینییش دەكرێت ئەم ئاهەنگی لەدایكبوونە هاوكات بێت لەگەڵ واژۆكردنی یاداشتی لێكتێگەیشتن بۆ كۆتاییهێنان بە جەنگ لەگەڵ ئێران.