ئیسرائیل به‌ مه‌رج له‌ باشووری لوبنان ده‌كشێته‌وه‌

په‌یام
ڕاوێژکارێکی سەرۆکوەزیرانی ئیسرائیل ڕایگەیاندووە کە قه‌واره‌كه‌یان خۆی بە پابەندی ئەو بەندانە نازانێت کە تایبەتن بە لوبنان لە ڕێککەوتنی ئەم دواییەی نێوان ویلایەتە یەکگرتووەکانی ئەمریکا و کۆماری ئیسلامیی ئێراندا. 
میدیای "ئەکسیۆس" ی ئەمریکی لە زاری ئەو ڕاوێژکارەوە بڵاویکردەوە، بنیامین نەتانیاهۆ بە سەرۆکی ئەمریکای ڕاگەیاندووە کە سوپاکەی لەو ناوچانەی باشووری لوبنان ناکشێتەوە کە ئێستا لەژێر کۆنترۆڵیدان، مەگەر دوای داماڵینی تەواوەتی چەک لە دەستی حزبوڵڵای لوبنانی. 
ئەم لێدوانانە ئاماژەن بۆ بوونی جیاوازیی قووڵ لە نێوان هەڵوێستی تەلئەبیب و دەرەنجامەکانی لێکتێگەیشتنی ئەمریکا و ئێراندا، لە کاتێکدا ئیسرائیل بەردەوام جەخت دەکاتەوە کە هەر ڕێکخستنێکی ئەمنیی داهاتوو لەسەر سنوورەکانی باكوور، دەبێت کۆتاییهێنان بە پێگەی سەربازیی حزبوڵڵا و ڕێگریکردن لە دووبارە جێگیربوونەوەی لەسەر سنوورەکان لەخۆ بگرێت. 
ئەم پەرەسەندنانە لە کاتێکدا دێن کە چاودێران چاوەڕوانی لێکەوتەکانی ڕێککەوتنەکەی واشنتن و تاران دەکەن لەسەر چەندین مەلەفی هەرێمی، لەوانەش دۆخی ناوخۆی لوبنان، ئایندەی چەکدارانی حزبوڵڵا لە باشووری ڕووباری لیتانی و چۆنیەتی جێبەجێکردنی بڕیارنامەی ١٧٠١ی ئەنجومەنی ئاسایشی نێودەوڵەتی.