سووریا... ناوی ئەندامانى پەرلەمان ڕاگەیەنرا

سەرۆکی لیژنەی باڵای هەڵبژاردنەکانی سوریا ناوی ئەندامانی ئەنجومەنی گەلی ڕاگەیاند، کە پێکهاتوون لە ئەندامانی هەڵبژێردراو و ئەوانەی لەلایەن سەرۆککۆمار ئەحمەد شەرعەوە دەستنیشانکراون. 
محەمەد تەها ئەلئەحمەد، سەرۆکی لیژنەی باڵای هەڵبژاردنەکان، لە کۆنگرەیەکی ڕۆژنامەوانیدا مەرسوومی ژمارە ١٤٣ ی ساڵی ٢٠٢٦ی خوێندەوە کە لەلایەن سەرۆککۆمار ئەحمەد شەرعەوە دەرچووە. ئەم مەرسوومە ناوی تەواوی ئەندامانی ئەنجومەنەکە لەخۆدەگرێت، کە پێکدێن لەو ئەندامە هەڵبژێردراوانەی پێشتر ناویان لەلایەن لیژنەکەوە ڕاگەیاندرابوو، لەگەڵ ئەو سێیەکە پڕکەرەوەیەی کە لەلایەن سەرۆککۆمارەوە و بەپێی دەسەڵاتە دەستوورییەکانی دیاریکراون. 
ئەم ڕاگەیاندنە دوای نزیکەی ساڵێک دێت لە دەرچوونی مەرسوومی سەرۆکایەتی ژمارە ٦٦ ی ساڵی ٢٠٢٥، کە تێیدا لیژنەی باڵای هەڵبژاردنەکانی ئەنجومەنی گەل ڕاسپێردرا بۆ سەرپەرشتیکردنی پێکهێنانی دەستەکان و هەڵبژاردنی دوو لەسەر سێی ئەندامانی ئەنجومەنەکە، بەو مەرجەی سێیەکی باقیی ئەندامەکان لەلایەن سەرۆککۆمارەوە و بەپێی ماددەی ٢٤ ی ڕاگەیاندنی دەستووری دابمەزرێن. 
پێشتر و لە ٢٠ی ئابی ٢٠٢٥دا، ئەحمەد شەرع مەرسوومی ژمارە ١٤٣ ی ساڵی ٢٠٢٥ی تایبەت بە پەسەندکردنی سیستمی هەڵبژاردنی کاتیی ئەنجومەنی گەل دەرکردبوو. بەپێی ئەو سیستمە، کۆی ژمارەی ئەندامانی ئەنجومەنەکە بە ٢١٠ ئەندام دیاریکراوە، کە ١٤٠ ئەندامیان لە ڕێگەی دەنگدانەوە هەڵدەبژێردرێن و ٧٠ ئەندامەکەی دیکەش لەلایەن سەرۆککۆمارەوە دەستنیشان دەکرێن؛ هاوکات بڕیار درا کە بازنەکانی هەڵبژاردن لەسەر ئاستی ناوچە کارگێڕییەکان بن.