هێشتا سوپای ئیسرائیل لە باشووری لوبنان نەکشاوەتەوە و بڕیاریش کشانەوەیان پێ نەگەیشتووە

پەیام
سوپای ئیسرائیل تا ئێستا فەرمانی کشانەوەی لە خاکی لوبنان پێنەگەیشتووە، لە کاتێکدا ئەمریکا تاوتوێی دامەزراندنی میکانیزمێکی چاودێری ئاگربەست دەکات و پرسی مەشقی هێزە لوبنانییەکانیش لە دەرەوەی وڵات تاوتوێ دەکرێت. 
بەگوێرەی سەرچاوە سەربازییەکان کە ڕۆژنامەی هائارێتس گواستوویەتییەوە، هێزەکانی سوپا تا ئەم ساتە هیچ بڕیارێکیان بۆ چۆڵکردنی هیچ ناوچەیەکی لوبنان پێنەگەیشتووە. لەگەڵ ئەوەشدا، سوپا سێ گوندی لە باشووری ئەو وڵاتە دەستنیشان کردووە بۆ ئەوەی لێیان بکشێتەوە، کە بریتین لە گوندەکانی فرون، غەندوریە و زەوتەری ڕۆژئاوا. 
سەبارەت بە شێوازی جێگیربوونی هێزەکان لەو ناوچانەدا، سەرچاوەکان ئاماژە بەوە دەکەن کە سوپا بە شێوەیەکی هەمیشەیی لە زەوتەر و زەوتەری ڕۆژئاوا بڵاونەکراوەتەوە، بەڵام لە هەردوو گوندی فرون و غەندوریەدا پێگەی خۆی جێگیر کردووە و تێیاندا ماوەتەوە. 
لە لایەکی دیکەوە، ئیدارەی ئەمریکا سەرقاڵی لێکۆڵینەوەیە لە پێکهێنانی میکانیزمێکی تایبەت بۆ چاودێریکردنی ئاگربەست لە لوبنان، کە هاوشێوەی ئەو هەنگاوانە دەبێت کە پێشتر لە غەززە جێبەجێ کراون. هاوکات لە چوارچێوەی گفتوگۆکاندا، پرسی ڕەخساندنی دەرفەتێک بۆ هێزەکانی لوبنان تاوتوێ کراوە، بۆ ئەوەی لە وڵاتێکی سێیەمدا مەشقی سەربازی وەربگرن.