قالیباف: لەگەڵ عومان لەسەر میكانیزمی كەشتیوانی لە گەرووی هورمز ڕێككەوتووین

پەیام

محەمەد باقر قالیباف، سەرۆكی پەرلەمانی ئێران، جەخت لە ڕێگری وڵاتەكەی لە دەستوەردانی ئەمریكا لە گەرووی هورمز دەكاتەوە و ڕایگەیاند، بەپێی یاداشتنامەیەكی لێكتێگەیشتنی هاوبەش لەگەڵ عومان گەیشتوونەتە ڕێككەوتنێك بۆ دانانی میكانیزمێكی نوێی كەشتیوانی لە گەرووی هورمز.

محەمەد باقر قالیباف لە لێدوانێكی ڕۆژنامەوانیدا ئاشكرای كرد كە تاران و سوڵتانی عومان لەسەر میكانیزمێكی تایبەت بە كەشتیوانی لە گەرووی هورمز ڕێككەوتوون.

 ناوبراو ئاماژەی بەوە كرد، كە ئەم هەنگاوە بەپێی بڕگەی پێنجەمی ئەو یاداشتنامەی لێكتێگەیشتنە دێت، كە پێشتر واژۆ كراوە و تاران بەردەوام دەبێت لە جێبەجێكردنی، بۆ ئەم مەبەستەش لەگەڵ سەرجەم ئەو دەوڵەتانەی دەكەونە سەر ئاوە هەرێمییەكان ڕاوێژ و گفتوگۆ دەكەن.

قالیباف لە درێژەی قسەكانیدا هێرشی كردە سەر هەوڵەكانی ئیسرائیل و ڕایگەیاند، تەلئەبیب بە هەموو شێوەیەك هەوڵی تێكدان و پەكخستنی ئەو یاداشتنامەی لێكتێگەیشتنە دەدات كە لەنێوان ئێران و ئەمریكادا هەیە.

هەر لەو چوارچێوەیەدا، باسی لەوە كرد، كە توانای ڕێگری و بەرپەرچدانەوەی سەربازیی ئێران لە ناوچەكەدا هێندە گەورە و كاریگەرە، كە دەبێتە بەربەستێكی ڕاستەقینە لەبەردەم ئیسرائیلییەكان بۆ دووبارە دەستپێكردنەوەی جەنگ.

ئەم لێدوانانەی سەرۆكی پەرلەمان دووپاتكردنەوەی هەڵوێستی توندی تارانە بەرامبەر بە پاراستنی ئاسایشی ناوچە ئاوییەكان و ڕەتكردنەوەی هەر جۆرە دەستوەردانێكی ئەمریكا لە گەرووی ستراتیژی هورمزدا.