ئه‌مریكا: هێرشه‌كانی سه‌ر ئێران به‌هێزتر بوون له‌ هێرشه‌كانی پێشووتر

په‌یام
بەرپرسێکی ئەمریکی ڕایگەیاند کە هێرشەکانی شەوی سێشەممەی وڵاتەکەی بۆ سەر ئێران بەهێزتر بوون لە پێشووتر، ئەمەش وەک وەڵامێکی ڕاستەوخۆ بووه‌ بۆ بەئامانجگرتنی کەشتییە بازرگانییەکان لە گەرووی هورمز.
ئەو بەرپرسە لە لێدوانێکدا بۆ تۆڕی میدیایی «ئێن بی سی»ی ئەمریکی ڕوونیکردەوە، ئەم پەرچەکردارە دەرئەنجامی ڕاستەوخۆی ئەو هێرشانەیە کە کراونەتە سەر کەشتییەکان لە کاتی تێپەڕبوونیان بە گەرووی هورمزدا. ناوبراو ئاماژەی بەوەش کرد کە لایەنی ئێرانی پێشوەختە ئاگاداری لێکەوتەکانی ئەم هەنگاوانەی بووە، بەڵام سەرەڕای ئەوەش بڕیاری ئەنجامدانی ئەو هێرشانەی داوە.
لەلایەکی دیکەوە، فەرماندەیی ناوەندیی هێزەکانی ئەمریکا (سێنتکۆم) پێشتر تارانی تۆمەتبار کردبوو بەوەی سێ کەشتیی بازرگانی لە گەرووی هورمزدا کردووەتە ئامانج. بەگوێرەی ڕاگەیەندراوەکانی سێنتکۆم، ئەم پێشێلکارییانەی ئێران پێچەوانەی ئەو یاداشتنامەی لێکتێگەیشتنەیە کە پێشتر لە نێوان واشنتۆن و تاراندا واژۆ کرابوو.