قەرزە نێوخۆییەكانی عێراق زیاترلە 103 تریلیۆن دیناری تێپەڕاندووە

پەیام 

قەرزە نێوخۆییەكانی عێراق بە شێوەیەكی بەرچاو زیادیان كردووە و زیاتر لە 103 تریلیۆن دیناری تێپەڕاندووە.

بەپێی ئەو داتایانەی لە ڕاپۆرتی مانگانەی بانكی ناوەندیی عێراقدا هاتووە، كۆی گشتیی قەرزە نێوخۆییەكان تاوەكو مانگی ئایاری 2026 گەیشتووەتە 103 تریلیۆن و 179 ملیار و 310 ملیۆن دینار، لەكاتێكدایە لە ساڵی 2015دا كۆی ئەو قەرزانە تەنیا 32 تریلیۆن و 142 ملیار دینار بووە.

زۆرترین قەرزی بانكی ناوەندی لای وەزارەتی دارایییە و ئەو قەرزەی وەریگرتووە گەیشتووەتە زیاتر لە 63 تریلیۆن دینار و نزیكەی 61%ی كۆی گشتیی قەرزە نێوخۆییەكان پێكدەهێنێت.

د.مەزهەر محەممەد ساڵح، راوێژکاری دارایی سەرۆکوەزیرانی عێراق هۆکاری زیادبوونى قەرزەکانى گەڕاندووەتەوە بۆ کەمبوونەوەی داهاتە نەوتییەکان و ئەو بارودۆخە نائاساییانەى رووبەڕووی دارایی وڵات بوونەتەوە، ئەوەش وایکردووە سیاسەتی دارایی پەنا بۆ قەرزکردنی ناوخۆیی ببات.