عێراق و توركیا بەمزووانە ڕێككەوتنێك لەبارەی بۆریی نەوتی نێوانیانەوە واژوو دەكەن

پەیام 

بۆ دامەزراندنی سندوقێكی وەبەرهێنانی هاوبەش و فراوانكردنی هاوكارییەكانی كەرتی وزە و گەشەپێدان، عێراق و توركیا چەند كۆبوونەوەیەكیان ئەنجام دا و هەفتەی داهاتووش ڕێككەوتنێك لەبارەی بۆریی نەوتی نێوانیانەوە واژوو دەكرێت.

عەلی فالح زەیدی، سەرۆكوەزیرانی عێراق، لەگەڵ ئەلپ ئەرسلان بایرەكتار، وەزیری وزە و سەرچاوە سروشتییەكانی توركیا لە بەغداد كۆ بووەوە و تێیدا جەخت لە دامەزراندنی سندوقێكی هاوبەشی عێراقی-توركی كرایەوە بۆ دابینكردنی دارایی پڕۆژە گەشەپێدان و وەبەرهێنانەكان، وەك هەنگاوێك بۆ بەهێزكردنی هاوبەشیی ئابووری نێوان هەردوو وڵات.

سەرۆكوەزیرانی عێراق ئاماژەی بەوە كرد كە پەیوەندییەكانی هەردوو وڵات لەسەر بەرژەوەندی ستراتیژی و مێژوویی بنیادنراون. 

ناوبراو داوای لە كۆمپانیا توركییەكان كرد وەبەرهێنانەكانیان بەتایبەت لە كەرتی كشتوكاڵدا فراوانتر بكەن، جەختیشی لە پابەندی حكومەت كردەوە بۆ پێشكەشكردنی ئاسانكاری پێویست بۆ ڕاكێشانی وەبەرهێنانی جۆری.

هاوكات، وەزیری وزەی توركیا لەگەڵ باسم محەمەد خدر، وەزیری نەوتی عێراق، پرسی پەرەپێدانی هاوكارییەكانی نەوت و گاز و سوودوەرگرتن لە بۆری نەوتی عێراق-توركیای تاوتوێ كرد و هەردوولا جەختیان لە پاڵپشتی پڕۆژەی "ڕێگەی گەشەپێدان" كردەوە تاوەكو ببێتە ڕێڕەوێكی ناوچەیی بۆ وزە و بازرگانی، بەو ئامانجەی تەواوكاریی ئابووری نێوان بەغدا و ئەنقەرە بگاتە ئاستێكی پێشكەوتوو.

وەزیری وزەی توركیا وتیشی گواستنەوەی نەوت لە عێراقەوە بۆ جەیهان بەردەوام دەبێت و لەبارەی بۆریی نەوتی عێراق توركیاوە ڕێككەوتنەكەمان گەیشتووەتە قۆناغی كۆتایی و ئامانجمانە ڕۆژانی داهاتوو واژووی بكەین و بڵاوی بكەینەوە.