ئێران: هه‌ر ڕێكخستنێك له‌ گه‌رووی هورمز ده‌بێت به‌ هه‌ماهه‌نگی تاران و مه‌سقه‌ت بێت

په‌یام
وەزارەتی دەرەوەی ئێران ڕایگەیاند، تاران و مەسقەت بە بەشداریی قەتەر، لەسەر ئاستی وەزیرانی دەرەوە بۆ ڕێکخستنی هاتوچۆ و پاراستنی ئاسایشی دەریایی لە گەرووی هورمز گفتوگۆیان ئەنجام داوە. 
بەپێی ڕاگەیەندراوێکی وەزارەتی دەرەوەی ئێران، کۆبوونەوەکان بە ئامادەبوونی شاندێکی یاسایی و هونەریی هەردوو وڵات لە مەسقەتی پایتەختی عومان بەڕێوە چوون. لە میانی دیدارەکاندا، هەردوو لا تاوتوێی ڕێکارەکانی دەستەبەرکردنی ئاسایشی کەشتیوانییان لە گەرووەکەدا کرد، بە ڕەچاوکردنی مافە سەروەرییەکانی هەر یەک لە ئێران و سوڵتاننشینی عومان. 
تاران جەختی لەوە کردەوە کە داڕشتنی هەر ڕێکـخستنێکی نــوێ بۆ بەڕێوەبردنی هاتوچۆ لە گەرووی هورمز، دەبێت لە ڕێگەی ڕاوێژی هاوبەشی نێوان هەردوو وڵاتەوە بێت. هەروەها ئاماژەی بە پێشهاتەکانی ئەم دواییە و لێکەوتە ئەمنییەکانی ئەو جەنگە کرد کە بە وتەی تاران لەلایەن ئەمریکا و ئیسرائیلەوە سەپێندراوە.
لە بەشێکی دیکەی ڕاگەیەندراوەکەدا هاتووە کە شاندێکی حکومەتی قەتەر بەشدارییان لە بەشێکی کۆبوونەوەکاندا کردووە. ئەمەش لە کاتێکدایە کە دەوحە وەک وڵاتێکی ناوچەکە، لە چەند مانگی ڕابردوودا ڕۆڵی نێوەندگیری لە دانوستانەکانی نێوان ویلایەتە یەکگرتووەکانی ئەمریکا و ئێراندا گێڕاوە.