گەڕێكی دیكەی گفتوگۆكانی ئێران و عومان لەسەر گەرووی هورمز بەڕێوەدەچێت

پەیام   

گەڕێكی دیكەی گفتوگۆكانی ئێران و عومان لەبارەی گەرووی هورمزەوە بەڕێوە دەچێت و بەپێی زانیارییەكان قەتەریش تێیدا بەشدارە.

ئەمڕۆ شەممە، عەباس عەراقچی وەزیری دەرەوەی ئێران بە سەردانێك گەیشتە مەسقەتی پایتەختی عومان و ئاژانس و سەرچاوەكانی هەواڵی ئێرانیش ڕایانگەیاند: سەردانەكە بە مەبەستی گفتوگۆكردنە لەبارەی گەرووی هورمز و گۆڕانكارییەكانی ناوچە و پەیوەندییەكانی دوو وڵات.

پێشتریش وتەبێژی وەزارەتی دەرەوەی ئێران ڕایگەیاند: سەردانەكەی عەراقچی بۆ تەواوكردنی پرس و ڕاوێژی تایبەت بە گەرووی هورمز كە دوو مانگە لەگەڵ عومان دەستی پێكردووە.

هەر لەو بارەوە ماڵپەڕی ئەكسیۆسی ئەمریكی بڵاوی كردەوە "شاندی قەتەریش بەشداریی لە گفتوگۆكانی مەسقەت لەبارەی گەرووی هورمزەوە دەكات".

ماڵپەڕە ئەمریكییەكە بڵاوی كردەوە هەر سێ لایەن گفتوگۆی دەركردنی ڕاگەیەنراوێك دەكەن لەبارەی سەرلەنوێ كردنەوەی ڕێڕەوی ناوەڕاستی گەرووەكە كە دەكەوێتە چوارچێوەی ئاوە نێودەوڵەتییەكانەوە.

هورمز وەك گەروویەكی ستراتیجی دەكەوێتە نێو سنووری ئاوەكانی ئێران و عومانەوە و بە یەكێك لە خاڵە ناكۆك و جێمشتومڕەكانی نێوان ئێران و ئەمریكا دادەنرێت.