ئێران پێگه‌ی ئه‌مریكای له‌ وڵاتانی كه‌نداو بۆردومان كرد

سوپای ئێران و سوپای پاسداران بە مووشەکی بالیستی و درۆن هێرشیان کردە سەر بنکە سەربازییەکانی ویلایەتە یەکگرتووەکانی ئەمریکا لە کووەیت، بەحرەین، ئوردن، ئیمارات و قەتەر. 
سوپای ئێران ڕایگەیاند لە وەڵامی هێرشەکانی ویلایەتە یەکگرتووەکانی ئەمریکا، بە فڕۆکەی بێفڕۆکەوانی خۆکوژ سیستەمی پاتریۆت، کۆگایەکی تەقەمەنی و وێستگەیەکی ڕاداری سوپای ئەمریکای لە کووەیت پێکاوە. هاوکات لە بەحرەین بنکەیەکی پەیوەندی و ڕاداری سوپای ئەمریکا و لە ئوردنیش بنکەی ئاسمانیی شازادە حەسەنیان بە مووشەکی بالیستی کردە ئامانج، کە تێیدا ناوەندی فەرماندەیی و کۆنتڕۆڵی فڕۆکەی بێفڕۆکەوانی ئێم کیو-٩ لەناو براوە. سوپای پاسداران جەختی کردەوە هێرشەکان بنکەکانی ئەمریکای لە ئیمارات و قەتەریشی گرتووەتەوە و هۆشدارییان دا کە هەر دووبارەبوونەوەیەکی دەستدرێژییەکان، وەڵامی توندتری "دوژمنی ئەمریکی-سەهیۆنی" لێ دەکەوێتەوە. 
سوپای پاسداران ئاشکرای کرد کە ئەم هێرشانە دوای ئەوە دێن کە هێزەکانی ئەمریکا هەوڵیان داوە ڕێڕەوێکی نایاسایی لە باشووری گەرووی هورمز بسەپێنن، بەڵام لە لایەن هێزی دەریایی ئێرانەوە ڕێگرییان لێ کراوە و دواتر سوپای ئەمریکا چەند بنکەیەکی کەناراو و تاوەری پەیوەندیی ئێرانی بۆردوومان کردووە. تاران ڕایگەیاند ئەمە قۆناغی یەکەمی وەڵامەکانە و ئامانج لێی تێکشکاندنی ژێرخانی سەربازیی دوژمنە بۆ پاراستنی ئاسایشی ناوچەکە. ئەم پەرەسەندنە توندانە لە کاتێکدایە کە لە ٢٨ی شوباتی ڕابردووەوە جەنگی نێوان ویلایەتە یەکگرتووەکانی ئەمریکا و ئێران دەستی پێ کردووە و ئاسایشی دەریایی و گواستنەوەی وزە لە گەرووی هورمز ڕووبەڕووی قەیرانی گەورە بووەتەوە.