پله‌ی گه‌رما له‌ كۆریا بۆ به‌رزترین ئاست له‌ مێژووی ئه‌و وڵاته‌دا به‌رز بوه‌وه‌

په‌یام

پلەکانی گەرما لە باشووری ڕۆژهەڵاتی کۆریای باشوور گەیشتە ٤٢.٥ پلەی سەدی، کە بەرزترین ئاستە لە مێژووی وڵاتەکەدا. بەهۆی ئەم شەپۆلی گه‌رمایه‌وه‌، حکومەت باری لەناکاوی ڕاگەیاند و ڕێکارەکانی سەلامەتی راگه‌یاند.
بەپێی ئامارەکانی ئاژانسی کەشناسیی کۆریا، پاشنیوەڕۆی ڕۆژی یەکشەممە پلەی گەرما لە شاری یانگسان گەیشتە ٤٢.٥ پلەی سەدی. ئەم پێوانەیە کە بەرزترینە لەوەتەی دەستپێکی تۆمارەکانی کەشناسی لە نیمچە دوورگەی کۆریا لە ساڵی ١٩٠٤ەوە، بۆ پێنجەمین ڕۆژی لەسەریەک لەو شارەدا سنووری ٤٠ پلەی تێپەڕاندووە.
هاوکات لە شاری گیۆنگجۆی هەمان ناوچە، پلەکانی گەرما ٤٠.٢ پلەی سەدییان تۆمارکرد، کە ئەمەش بەرزترین ئاستە لە ماوەی هەشت ساڵی ڕابردوودا و یەکەمین جاریشە لەمساڵدا ئەو شارە بگاتە سەروو ٤٠ پلە. بەردەوامیی ئەم شەپۆلە گەرمایە کە تەواوی وڵاتەکەی گرتووەتەوە، دەسەڵاتدارانی خستووەتە حاڵەتی ئامادەباشیی تەواوەوە.
وەک کاردانەوەیەک بەرامبەر بەم دۆخە، حکومەتی کۆریای باشوور ئاستی باری لەناکاوی بۆ پلە دوو بەرزکردەوە. لەم چوارچێوەیەدا، سەرۆک وەزیران فەرمانی بە سەرجەم وەزارەت و دامەزراوە ناوخۆییەکان کردووە ڕێوشوێنی پێویست بۆ پاراستنی ئەو کەسانە بگرنەبەر کە زیاتر بەرکەوتەی مەترسییەکانی گەرمان و جەختیشی لە سەقامگیریی دابینکردنی کارەبا و ئاو کردووەتەوە، هەروەها داوا لە هاووڵاتیان کراوە خۆیان لە چالاکییەکانی دەرەوە بپارێزن.