ئێران ڕێککەوتنی کردنەوەی گەرووی هورمز ڕەت دەکاتەوە

سەرچاوەیەکی ئێرانی نزیک لە شاندی دانوستانکار سەرجەم ئەو هەواڵانەی ڕەت کردەوە کە باس لە ڕێککەوتن بۆ کردنەوەی گەرووی هورمز دەکەن. 
ئاژانسی فارسی تاران لە زاری سەرچاوەیەکی ئاگادارەوە بڵاویکردەوە، کە هیچ ڕێککەوتنێک بۆ کردنەوەی گەرووی هورمز لە ئارادا نییە و هەواڵە بڵاوکراوەکان بە تەواوی ناڕاستن. سەرچاوەکە جەختی کردەوە گەرووی هورمز تاوەکو بەردەوامیی هەنگاوە دوژمنکارییەکانی ئەمریکا بە داخراوی دەمێنێتەوە و هاتوچۆی کەشتییەکان تەنها لە ڕێگەی ئەو ڕێڕەوەی هێزی دەریایی سوپای پاسداران دیاریی کردووە و دوای وەرگرتنی مۆڵەت لێیان مومکین دەبێت. ئەم هەڵوێستە نیشانەی بوونی ئاڵنگاریی گەورەیە لەبەردەم هەر هەوڵێکی نێودەوڵەتی بۆ ئاساییکردنەوەی جووڵەی بازرگانی لە ناوچەکەدا. 
لەلایەکی دیکەوە، کەناڵی ١٢ی ئیسرائیلی لە زاری دیپلۆماتکارانەوە ئاشکرای کرد، کە گوایە ڕەزامەندیی عەباس عەراقچی وەزیری دەرەوەی ئێران لەسەر کردنەوەی گەرووی هورمز وای لە دۆناڵد ترەمپ سەرۆکی ئەمریکا کردووە هێرشە سەربازییە بێپێشینەکەی بۆ سەر تاران هەڵپەسێرێت. بەپێی ئەو زانیارییانە، دۆناڵد ترەمپ بڕیاری دابوو ئۆپراسیۆنێکی سەربازیی زەبەلاح ڕابگرێت لە بەرانبەر دەسپێشخەریی تاران بۆ واژۆکردنی ڕێککەوتنێکی خێرا بۆ کردنەوەی ڕێڕەوە ئاوییەکان و کۆتاییهێنان بە دۆسیەی ئەتۆمی. تاران جەخت دەکاتەوە کە تاوەکو واشنتن دەست لە سیاسەتە توندەکانی هەڵنەگرێت، هیچ متمانەیەک بە ئاڕاستە دیپلۆماسییەکان نادەن.