ئیسپانیا به‌ربه‌ستی ئاوی له‌ نێوان شاری سێوته‌ (سه‌بته‌) و خاكی مغرب دروست كرد

حکوومەتی ئیسپانیا کارەکانی دروستکردنی بەربەستی ئەمنی بۆ ڕێگریکردن لە کۆچبەران لە شاری سێوته‌  (سه‌بته‌)  سنووری ئەو وڵاتە لەگەڵ مەغریب تەواو کرد.
رۆژنامەی "ئێل پایس"ی ئیسپانی بڵاوی کردەوە کە حکوومەتی ئیسپانیا لە چوارچیوەی گرتنەبەری ڕێوشوێنەکان بۆ پاراستنی ئاسایشی سنوور، کارەکانی دروستکردنی ئەمنی بە درێژایی ٥٠٠ مەتر لە شاری سێوته‌ سنووری ئەو وڵاتە لەگەڵ مەغریب تەواو کردووە.
ڕۆژنامەکە باسی لەوەش کردووە کە ئامانج لە دروستکردنی بەربەستە ئەمنییەکە، ڕێگریکردنە لەو کۆچبەرانەی کە ھەوڵدەدەن بە نایاسایی لە مەغریبەوە بچنە ناو ئیسپانیاوە.
ھەر بەپێی ڕۆژنامەکە، بەرزی ئەو بەربەستە ئەمنییە لە سەرووی ڕووی ئاوەوە لەنێوان ٣٠ بۆ ٧٠ سانتیمەتر دەبێت و بە قوڵایی یەک مەتر بە ژێر ئاودا درێژدەبێتەوە.
ئەوەش دوای ئەوە دێت کە ڕۆژی ٣٠ی مانگی تەمووزی ئەمساڵ، دەسەڵاتدارانی ئیسپانیا ڕیگرییان لە ٨٠٠ کۆچبەر کرد کە ھەوڵیاندا لە کەناراوەکانی مەغریبەوە بە مەلەکردن خۆیان بگەیەننە شاری سێوته‌ لە ئیسپانیا.
ھاوکات دوای ڕووداوەکەش سەرۆکوەزیرانی ئیسپانیا، پێدرۆ سانچێز ڕایگەیاندبوو کە ھەموو ڕێوشوێنێک بۆ مامەڵەکردن لەگەڵ دۆخەکە، دەگرنەبەر.